Në Muzeun Historik Kombëtar është çelur ekspozita “Italia, nga vëllezërit Alinari te mjeshtrit e fotografisë bashkëkohore”.
Përmes fotografive, kjo ekspozitë shpalos para vizitorëve peizazhe, fragmente e fakte mbresëlënëse nga traditat dhe historia, si dhe pasionin dhe forcën e jashtëzakonshme krijuese të popullit italian.
Syri i fotografëve, përmes teknikave të ndryshme artistike, është ndalur për të fiksuar e dokumentuar ngjarje dhe identitete në periudha të ndryshme kohore.
Ekspozita sjell një rrëfim shumëzërësh përmes imazhesh dhe linjash delikate, ku vështrimi i fotografëve, me anë të tonaliteteve dhe teknikave të ndryshme artistike, tregon evolucionin e një vendi si Italia.
Ajo është e ndarë në tre seksione: peizazhe, vepra dhe portrete, duke vendosur një lloj komunikimi mes të sotmes dhe të shkuarës historike.
Të pranishmit në çeljen e ekspozitës i përshëndeti përfaqësuesi i Institutit Italian të Kulturës, Alessandro Ruggero, i cili theksoi se përherë e më shumë marrëdhëniet dhe bashkëpunimi mes Italisë e Shqipërisë vijojnë të rriten jo vetëm në fushën e kulturës, po dhe në fusha të tjera.
Nga ana e tij drejtori i Muzeut Historik Kombëtar, dr. Dorian Koçi, në fjalën e tij përshëndetëse tha se çelja e kësaj ekspozite në Muzeun Historik Kombëtar është e mirëpritur dhe ngjall shumë interes, duke na afruar më shumë me vendin fqinj.
Ndërkaq ambasadori italian në Shqipëri, Fabrizio Bucci, falënderoi për organizimin e kësaj ekspozite dhe shtoi se është e nevojshme që të bëhen edhe më shumë shkëmbime në fushën e artit dhe të kulturës mes dy vendeve.
Alinarët, janë si Marubët e fotografisë në Shqipëri. Është e vërtetë ajo që thuhet për fotografinë: ajo vendos në të njëjtën linjë syrin, mendjen dhe zemrën. Dhe kjo ekspozitë na e vërteton këtë.
Ekspozita është kuruar nga Rita Scartoni dhe Luca Criscenti, organizuar nga Instituti Italian i Kulturës në Tiranë në bashkëpunim me Muzeu Historik Kombëtar.
Ajo do të jetë e hapur për vizitorët deri më 25 shtator 2022.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
