Associated Press për filmin Zgjoi: Shpresa e Kosovës për të fituar Oscars

Agjencia e lajmeve amerikane “Associated Press”, përmes një artikulli ka shkruar për konkurrimin e filmit “Zgjoi” në Akademinë e Çmimeve “Oscars”, duke e konsideruar atë si shpresa e Kosovës për të fituar çmimin më prestigjioz të filmit.

“Filmi në gjuhën shqipe për një grua që fillon biznesin e saj pas Luftës së Kosovës ishte një perlë frymëzuese, por Basholli as që kishte guxuar të ëndërronte se sa larg do të arrinin. Jo vetëm që u bë filmi i parë në historinë e Sundance që fitoi tre çmimet më të mira në konkursin botëror të kinemasë, por tani ai ka një shans të madh për t’u bërë pretendenti i parë i Kosovës për Oscars në kategorinë më të mirë ndërkombëtare të filmit,” thuhet në artikull.

Tutje, aty shkruan se biznesi i Fahrije Hotit, Kooperativa Krusha, vazhdon të funksionojë edhe sot.

“Basholli e ka hasur në lajme Hotin vite më parë. Ajo e dinte se duhej të ishte një film dhe se Yllka Gashi, një aktore e njohur në Kosovë, duhet të luante. Basholli dhe Gashi u takuan me Hotin rreth vitit 2011 dhe kjo e përforcoi edhe më tej misionin e tyre për të treguar historinë e saj. Por do të duheshin gati nëntë vjet për ta nisur filmin dhe dy të tjera para se të kishte momentin e Hirushes në Sundance”.

AP shkruan se Basholli dhe Gashi ishin adoleshente në Kosovë kur shpërtheu lufta, por se e mbajnë mend mirë atë dhe gjithashtu vitet e vështira që kanë çuar deri në të

Suksesi i "Hive" ka bërë që i gjithë vendi t'i brohorasë edhe tani. Madje, njerëzit e kanë ndaluar Bashollin në rrugë për ta falënderuar që i ka bërë kaq krenarë.

“Njerëzit e njohin Yllkën sepse ajo është një aktore shumë e njohur dhe njerëzit e duan vërtet. Por të ndalosh regjisorin nuk ndodh kaq shumë këtu”, tha Basholli duke qeshur.

Ajo është pjesë e asaj që quhet Vala e Re e filmave në Kosovë. Gjatë vitit të kaluar, disa regjisore të tjera femra kanë marrë pjesë në festivale.

“Hive” është ndër 15 filmat që hynë në listën e ngushtë të Oscars për filmin më të mirë ndërkombëtar, i cili është i pari për Kosovën.

Ata do të mësojnë më 8 shkurt nëse do të jetë apo jo ndër pesë filmat që konkurrojnë për çmimin në Oscar më 27 mars.

Basholli, thotë se është skeptike. Ajo as që mendoi se "Hive" kishte një shans në Sundance. Por ajo është e lumtur për efektin që dha.

“Me të vërtetë më prek që njerëzit janë kaq krenarë për të. Me të vërtetë i bëri njerëzit të lumtur”, tha Basholli. “Kjo i jep shpresë njerëzve ashtu si Fahrija na dha shpresë neve kur ne punonim për filmin. Ajo kurrë nuk u dorëzua.”