Një zbulim i rrallë arkeologjik është bërë së fundmi në fshatin Strikçan të Bulqizës, ku është identifikuar varri i parë monumental i periudhës romake në territorin e Shqipërisë.
Lajmi është bërë i ditur nga Ministria e Ekonomisë, Kulturës dhe Inovacionit, Blendi Gonxhja, i cili njofton se ky zbulim është realizuar gjatë projektit kërkimor-shkencor “Kërkime Arkeologjike në Luginën e Bulqizës”, të udhëhequr nga Instituti i Arkeologjisë.
Monumenti varror ka përmasa 9 metra me 6 metra, me një dhomë funerare 2.4 metra të lartë, dhe përmban elementë të rrallë arkitektonikë dhe epigrafikë. Ajo që e bën këtë zbulim edhe më të veçantë është një mbishkrim bilingual (latinisht dhe greqisht), i cili i dedikohet të ndjerit Gelliano dhe perëndisë Jupiter.
Ky është mbishkrimi i parë i këtij lloji i zbuluar ndonjëherë në zonën e Dibrës.
Varri, i konceptuar me tre ambiente (dhomë varrimi, paradhomë dhe shkallare monumentale), ka ruajtur pjesë të inventarit arkeologjik: enë qelqi, objekte kocke, armë, si dhe fragmente tekstili të thurura me fije ari, dëshmi e statusit të lartë të të ndjerit.
Strukturat e sipërme sugjerojnë se monumenti ka pasur tipologjinë e një mausoleumi, duke e bërë këtë zbulim të pazëvendësueshëm për studimin e prapaktokës romake në Shqipëri.
Për shkak të rëndësisë së veçantë, Instituti Kombëtar i Trashëgimisë Kulturore, në bashkëpunim me DRTK Tiranë dhe në koordinim me Institutin e Arkeologjisë, do të ndjekin procedurat për vendosjen në mbrojtje paraprake të këtij siti arkeologjik, bën të ditur ministri Blendi Gonxhja.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
