Në kuadër të 100-vjetorit të lindjes së personalitetit të letrave shqipe, Jakov Xoxa, Biblioteka Kombëtare ka çelur sot një ekspozitë me krijimtarinë e tij, mes të cilave zbulohet edhe poezia e parë e botuar e në vitin 1942 si dhe një dorëshkrim i rrallë në vargje, pjesë e arkivit të familjes.
Në ekspozitë morën pjesë familjarë të shkrimtarit, personalitete të kulturës, akademikë, studiues, shkrimtarë, botues, pedagogë dhe studentë të Fakultetit të Historisë dhe të Filologjisë, etj.
Drejtori i Bibliotekës Kombëtare, z. Piro Misha, duke vlerësuar kontributin e vyer të shkrimtarit në letërsinë shqipe theksoi se “kjo ekspozitë synon të ndërtojë rrugëtimin e krijimtarisë së Jakov Xoxës nga poezia e tij e parë në moshën 19-vjeçare në gazetën “Tomori”, veprat e tij të plota e deri në studimet më të fundit mbi veprën e tij”.
Në ekspozitë janë të prezantuara që nga novelat e parë në ’49, tek botimi fillimisht në “Revistën Nëntori” i “Lumit të Vdekur” nisur nga viti 1961, përkthimet, materialet didaktike, librat që redaktoi mes të cilave “Komisari Memo” i Dritëro Agollit, botimet mbi veprën e tij shkruar nga studiues si Rexhep Qosja apo Nasho Jorgaqi.
Ekspozita do të qëndrojë e hapur për të gjithë vizitorët deri më 30 maj 2023.
100-vjetori i lindjes së shkrimtarit do të shoqërohet përgjatë këtij viti edhe me të tjera aktivitete përkujtimore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
