Në Ditën Ndërkombëtare të Muzeve, në Lezhë u inaugurua për herë të parë Muzeu Arkeologjik, një hapësirë e re kulturore që sjell për publikun pasurinë historike dhe arkeologjike të zonës ndër shekuj.
I vendosur pranë kalasë së qytetit, muzeu ekspozon materiale dhe objekte arkeologjike të zbuluara në Lezhë, që i përkasin periudhës nga prehistoria deri në mesjetë, duke dëshmuar vazhdimësinë historike dhe rëndësinë që ka pasur qyteti ndër vite.
Në ceremoninë e hapjes ishte i pranishëm edhe ministri i Turizmit, Kulturës dhe Sportit, Blendi Gonxhja, së bashku me kryetarin e Bashkisë Lezhë, Pjerin Ndreu.
Ata vlerësuan investimet në trashëgiminë kulturore si një mënyrë për të nxitur potencialin turistik të zonës dhe për të rritur interesin e vizitorëve vendas dhe të huaj.
Muzeu Arkeologjik i Lezhës është financuar nga Bashkimi Evropian përmes projektit ndërkufitar Shqipëri-Kosovë dhe është muzeu i dytë i hapur në qytet, pas Muzeut Etnografik, i ngritur disa vite më parë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
