Ditëlindja e 80-të e veprimtarit të zhdukur/ Kadare nderohet me titullin “Ukshin Hoti”

Komuna e Rahovecit ka nderuar me titullin “Ukshin Hoti”, shkrimtarit e shquar me famë ndërkombëtare, Ismaili Kadare. Në një ceremoni të veçantë, e cila u bë në nderim të ditëlindjes së 80të të veprimtarit të shquar, Profesor Ukshin Hoti, u kujtua komunikimi i Kadares dhe Ukshin Hotit, gjatë kohës që ky i fundit ishte në burg. Ndërkohë, u tha se besimi i Ukshin Hotit te Evropa nuk duhet të humb në Kosovë. Komisioni komunal në Rahovec, vendlindjen e Hotit, për vlerësimin e propozimeve për ndarjen e dekoratës “Ukshin Hoti”, i ka dhënë këtë dekoratë shkrimtarit të shquar shqiptar me përmasa botërore, Ismail Kadare, me këtë motivacion: "Në vlerësim të veprës atdhetare dhe të rolit të jashtëzakonshëm në fushën e kulturës, të historisë e të letërsisë shqiptare, të edukimit të brezave në frymën atdhetare, si dhe për meritat e veçanta për ndërgjegjësimin e opinionit ndërkombëtar për fatin e Ukshin Hotit; Për kontributin e çmuar letrar-artistik dhe afirmimin botërisht të vlerave të kulturës e të traditës autoktone shqiptare, si dhe për përpjekjet e parreshtura intelektuale për liri e mbrojtje të trojeve shqiptare.” Kontributi i madh i Ismail Kadaresë për promovimin e kulturës kombëtare shqiptare dhe shkrimet e tij për shqiptarët jashtë kufijve shtetëror administrativë të Republikës së Shqipërisë, me theks të veçantë për tragjedinë e Kosovës, luftën çlirimtare dhe të drejtën e popullit shqiptar për liri e dinjitet njerëzor e kombëtar, e bën këtë personalitet aq të vlerësuar e të dashur gjithandej dhe na bën që të ndihemi krenarë me arritjet e tij”. Bashkëshortja e Ismaili Kadare, shkrimtarja Helena Kadare, e cila ishte e pranishme në ceremoni, tha se Ukshin Hoti është një njeri që besoi dhe luftoi për ide duke besuar në një forcë të jashtëzakonshme që është në shpirtin e këtij vendi të cilin historia e ka ndëshkuar vazhdimisht. Ajo shtoi se gjithë veprimtaria e Ukshin Hotit janë një testament i rëndësishëm mbi të cilin duhet të vijojë puna për Kosovën demokratike që sheh drejt Evropës. Edhe pse janë bërë më shumë se dy dekada që nga zhdukja e tij e dhunshme, për fatin e profesor Ukshin Hotit nuk dihet asgjë deri më sot.