Regjisori i famshëm i teatrit, britaniku Peter Brook fitoi çmimin prestigjioz spanjoll të arteve si “një nga rinovuesit e arteve të interpretuara".
"Peter Brook hapi horizonte të reja për dramaturgjinë bashkëkohore, duke kontribuar në mënyrë vendimtare në shkëmbimin e kulturave të ndryshme: të Evropës, të Afrikës dhe të Azisë… Brook vazhdon ta mallëngjejë publikun me vënie në skenë që shfaqin dlirësi dhe thjeshtësi, sipas konceptit të tij të “hapësirave të zbrazëta”, u shpreh juria në një deklaratë të saj.
I konsideruar si "regjisori më i mirë i artit i shekullit XX" fituesi i çmimeve “Tony” dhe “Emmy” ka drejtuar gjithashtu edhe opera dhe film në skena të Evropës dhe të vendeve si: India, Afrika e Jugut dhe Irani.
Ai është shumë i njohur për përshtatjen e tij të “Mahabharata” në vitin 1985, një prodhim teatror prej gjashtë orësh i epikës fetare indiane.
94-vjeçari nisi të drejtojë profesionalisht që në moshë të re duke marrë përsipër Jean Cocteau, Shakespeare dhe Jean-Paul Sartre që para moshës 20 vjeç.
Ai mori drejtimin e Royal Opera House ndërmjet viteve 1947 dhe 1950, kohë në të cilën vuri në skenë operën e Richard Strauss-it “Salome” me kostume të krijuara nga artisti surrealist Salvador Dali.
Në vijim, në vitin 1960 ai u bë regjisor i teatrit Mbretëror të Shekspirit (Royal Shakespeare Theatre) në Stratford-upon-Avon, England, pozicion prej të cilit ai hoqi dorë pasi u ndalua të bashkëpunonte me aktorë ndërkombëtarë.
Ai u vendos me banim në Francë në vitin 1970 ku krijoi Qendrën Ndërkombëtare për Kërkime Teatrore (International Centre for Theatre Research - French acronym, CIRT), që tani quhet Qendra Teatrore për Krijim Teatri (International Centre for Theatre Creation (ICTC). Ai drejtoi gjithashtu teatrin “Bouffes du Nord” në Paris në vitet 1974-2010.
Fondacioni Princesha e Asturiasit e jep çmimin e arteve për "kontribut në trashëgiminë kulturore të njerëzimit” si dhe për shtatë kategori të tjera.
Ceremonia e çmimeve mbahet në veri të Spanjës në Oviedo në tetor nga anëtarët e familjes mbretërore.
Fitues të tjerë përfshijnë regjisorë si Martin Scorsese dhe Francis Ford Coppola. /sipas EuroNews, përgatiti Erina Çoku/
* Çmimet e Princeshës së Asturias, të quajtura më parë Çmimet e Princit të Asturias (1981-2014) janë një seri çmimesh vjetore që jepen në Spanjë nga Fondacioni i Princeshës së Asturias (ish-Fondacioni i Princit të Asturias) për individë, subjekte apo organizata nga e gjithë bota që kanë arritje të dukshme në shkenca ekzakte shoqërore dhe marrëdhënie publike. (Emri u ndërrua për hir të trashëgimtares së re Leonor, Princeshë e Asturiasit.)
Fituesve të çmimit u jepet një skulpturë e krijuar posaçërisht nga artisti i mirënjohur spanjoll Joan Miró.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
