Përvjetori i vdekjes së Çesk Zadesë/ Gonxhja: I dha formë dhe shpirt muzikës shqiptare

Ministria e Ekonomisë, Kulturës e Inovacionit, ka përkujtuar 27 vjetorin e vdekjes së themeluesit të kompozicionit shqiptar, ‘Mjeshtrit të Madh’, Çesk Zadeja (8 qershor 1927- 15 gusht 1997).

Ministri Blendi Gonxhja, kujtoi me nderim dhe mirënjohje, jetën dhe veprën e pavdekshme të mjeshtrit që sipas tij i dha shpirt muzikës shqiptare.

Një pionier dhe figurë që i dha formë dhe shpirt muzikës shqiptare, ku përmes veprës së tij ngriti ura ndërlidhëse mes brezave dhe kulturave, duke sjellë harmoninë dhe bukurinë e muzikës në çdo notë që kompozoi.

Çesk Zadeja u diplomua në Konservatorin “Santa Cecilia” të Romës. Që në bankat e shkollës ka qenë këngëtar i korit dhe instrumentist i orkestrave shkollore dhe të qytetit.

Në vitet 1946-1947 ka drejtuar redaksinë e muzikës në Radio Tirana dhe më pas dirigjent i Ansamblit të Ushtrisë. Çesk Zadeja u bë i njohur dhe zuri një ndër vendet e korifeut të muzikës sonë pas përfundimit shkëlqyeshëm të Konservatorit “Çajkovski” të Moskës. Fill pas diplomimit ai përfundoi “Simfoninë” me të cilën fitoi çmimin e parë kombëtar.

Zadeja ka dhënë ndihmesën e tij si udhëheqës artistik i Ansamblit të Këngëve dhe Valleve, si pedagog në Konservatorin e Tiranës, si udhëheqës artistik i Teatrit të Operës dhe Baletit në Tiranë. Ai mban titujt “Artist i Popullit” dhe “Profesor”, si dhe ka merituar shumë urdhra dhe çmime.

Një vit më parë Çesk Zadeja u nderua nga Akademia e Shkencave e Shqipërisë, me titullin e mirënjohjes “Nderi i Akademisë”.

Kompozitori Zadeja mbahet mend përmes muzikës të fuqishme të filmit “Skënderbeu”, shkruar në bashkëpunim me një kompozitor rus.

U nda nga jeta në Romë më 15 gusht 1997.