Në Ditën Ndërkombëtare të Monumenteve, Gjirokastra me aktivitete për monumente kulturore dhe arkeologjike

Në kuadër të 18 Prillit, Ditës Ndërkombëtare të Monumenteve dhe Parqeve Arkeologjike, bashkia Gjirokastër organizoi një aktivitet të veçantë.

Në mënyrë simbolike organizimi u zhvillua në mjediset karakteristike të banesës së gurtë të Zekatëve, një prej vlerave të trashëgimisë kulturore për qytetin e Gjirokastrës.

Pjesëmarrësit në aktivitet, përfaqësues të institucioneve publike, pushtetit vendor, specialistë të trashëgimisë kulturore, restauratorë, etj, evidentuan vlerat historike dhe ndërtimore të monumenteve të kulturës në Gjirokastër si pjesë e UNESCO-s.

Mes të tjerash ata theksuan rëndësinë e promovimit dhe rijetëzimit të monumenteve për zhvillimin e turizmit të qëndrueshëm.

Pjesë e këtij aktiviteti ishte dhe promovimi i librit “Lugina e Drinosit” të arkeologut Vladimir Qirjaqi, i cili është ndarë nga jeta përpara disa vitesh.

Botimi i librit u mundësua si bashkëpunim i Universisitetit “Eqrem Çabej” dhe Unionit të Gazetarëve. “Me veprimtarinë e tij ai mbeti një nga intelektualët më të angazhuar në evidentimin dhe mbrojtjen e trashëgimisë arkeologjike, historike dhe arkitekturore të Luginës së Drinos.

Promovimi i librit “Lugina e Drinosit” është guri i çmuar që arkeologu Qirjaqi i la arkeologjisë shqiptare dhe qytetit të tij”, u shprehën pjesëmarrësit në aktivitet.

Këshilli Ndërkombëtar i Monumenteve dhe Vendbanimeve Historike, ( ICOMOS ) gjatë një mbledhje në Tunizi, më 18 prill 1982, vendosi që kjo datë të shpallet si Dita Ndërkombëtare e Monumenteve dhe Vendbanimeve Historike.

Ky vit përkon me 40-vjetorin e shpalljes së kësaj dite.