Elbasani u mbush me gjallëri dhe festë një natë para 14 marsit, teksa mijëra qytetarë dhe vizitorë nga e gjithë Shqipëria u mblodhën për të festuar Natën e Verës, një nga traditat më të bukura dhe më të vjetra shqiptare.
Siç bën të ditur korrespondentja e MCN nga Elbasani, qyteti u zbukurua me dekorime shumëngjyrëshe, ndërsa rrugët kryesore u mbushën me panaire, muzikë dhe aktivitete për të gjitha moshat.
Aktivitetet kryesore u zhvilluan në sheshin kryesor të qytetit ndërsa në skenën e ngritur në qendër të qytetit, artistë të njohur të skenës shqiptare dhanë një koncert me performanca të ndryshme kulturore.
Grupi i valleve popullore dhe artistët e rrugës krijuan një atmosferë unike, duke ruajtur traditat dhe duke dhuruar emocione të veçanta për pjesëmarrësit.
Përveç festimeve, tregjet artizanale dhe kulinarike tërhiqnin vizitorët me produkte tradicionale, duke e bërë Natën e Verës jo vetëm një festë simbolike për ardhjen e pranverës, por edhe një mundësi për të promovuar kulturën dhe traditat e qytetit.
Elbasani, si epiqendra historike e kësaj feste, edhe këtë vit tregoi se ruan me krenari këtë trashëgimi të vyer, duke e kthyer Natën e Verës në një festë të madhe për të gjithë shqiptarët.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
