150-vjetori i lindjes së Asdrenit/ Meta: Frymëzuesit më të spikatur në krijimin e shtetit shqiptar

Sot shënohet 150-vjetori i lindjes së rilindësit dhe autorit të himnit kombëtar shqiptar, Aleksandër Stavre Drenova (ASDRENI).

Në këtë ditë të shënuar, presidenti Ilir Meta vlerësoi Asdrenin si një nga frymëzuesit më të spikatur të popullit shqiptar.

Në 150-vjetorin e lindjes, nderojmë sot kujtimin e paharruar dhe veprën e shquar të atdhetarit, patriotit të madh dhe rilindasit të ndritur, Aleksandër Stavre Drenova (ASDRENI), autorit të Himnit tonë Kombëtar dhe një prej frymëzuesve më të spikatur të popullit tonë në luftën për pavarësi, krijim të shtetit të lirë shqiptar dhe emancipim shoqëror.

Meta publikoi edhe një video të rrallë të viti 1929 të këndimit të himnit kombëtar.

Në këtë ditë, po ndaj me ju një filmim të rrallë me zë dhe figurë, të vitit 1929 në Tiranë, më të vjetrin e publikuar deri më tani të këndimit të Himnit Kombëtar, të prezantuar nga akademiku i njohur, Vasil Tole.