Promovohet libri “Kultura e gjuhës sot”, i akademikut Gjovalin Shkurtaj

Doli nga shtypi vepra “Kultura e gjuhës sot” e akademikut Gjovalin Shkurtaj

Akademia e Shkencave bën të ditur se libri trajton probleme të mprehta të dukurive aktuale në përdorimin e gjuhës shqipe, nga ruajtja dhe mbrojtja e gjuhës shqipe letrare deri tek gojështhurja dhe mungesa e kujdesit për gjuhën, si dukuri të tranzicionit, që duhet të marrin fund.

Libri “Kultura e gjuhës sot” i akademikut Gjovalin Shkurtaj doli në dritën e botimit, pikërisht në ditët e përkujtimit të 50-vjetorit të Kongresit të Drejtshkrimit. Ky libër vjen mbas shumë librave të mëparshëm të akad. Shkurtaj që kanë si bosht dukuri e probleme aktuale të kulturës së gjuhës.

Akad. Shkurtaj shkruan, se libri mund të shërbejë si bazë për lëndën “Kultura e gjuhës” që është e domosdoshme dhe shpreson të futet si lëndë e re në të gjitha degët e shkollave të larta.

Ai thekson se, qëllimi i kësaj përmbledhjeje studimesh është të shtohet kujdesi për shqipen standarde në përdorimet zyrtare të administratës, të medieve e reklamave, të gazetave e revistave (në letër dhe online) në të gjitha hapësirat shqiptare.

Synimi kryesor është të ritheksojmë, duke sjellë edhe përditësime e të dhëna të reja të kohëve të fundit, se mbrojtja e gjuhës shqipe letrare nuk është censurë, por detyrim e peng moral gjithëkombëtar. Japim, natyrisht, edhe shumëçka nga shkrimet tona të mëhershme për kulturën e gjuhës shqipe dhe kundrime sociolinguistike të vlefshme për njohjen e situatës së sotme të shqipes së shkruar e të folur në Shqipëri dhe në të gjitha trojet apo hapësirat etnike shqiptare e që mund t’u vlejnë studentëve dhe masë së gjerë të lexuesve