Në kuadër të 95-vjetorit të lindjes së shkrimtarit të madh Dritëro Agolli, në fshatin e tij të lindjes, Menkulas të Devollit, është inauguruar zyrtarisht muzeu kushtuar jetës dhe veprës së tij të pasur letrare.
Në ceremoninë festive mori pjesë Presidenti i Republikës, Bajram Begaj, së bashku me studiues, autoritete lokale, familjarë dhe dhjetëra banorë të zonës.
Gjatë fjalës së tij, Presidenti Begaj vlerësoi lart kontributin e Agollit në letërsinë dhe kulturën shqiptare, duke theksuar lidhjen e tij të pandarë me njerëzit e thjeshtë, të cilët mbetën burimi kryesor i frymëzimit të tij.
Një rol kyç në realizimin e projektit pati Këshilli i Qarkut Korçë dhe Bashkia Devoll.
Kryebashkiaku Eduard Duro falënderoi të gjithë kontribuuesit dhe iu bëri thirrje miqve, kolegëve e bashkëpunëtorëve të shkrimtarit që të dhurojnë fotografi, dokumente apo materiale të tjera autentike për të pasuruar më tej fondin muzeal.
Për familjen Agolli, përurimi i muzeut përmbush një dëshirë të rëndësishme të shkrimtarit. Nipi i tij, Emil Agolli, u shpreh i emocionuar që kjo dëshirë u bë realitet, duke theksuar se Menkulasi ishte vendi ku gjyshi i tij kaloi fëmijërinë dhe hodhi themelet e formimit të tij.
Familja ka sjellë në muze sende personale të shkrimtarit, mes tyre makinën e shkrimit, stilolapsa, libra nga biblioteka e tij, fotografi dhe objekte të tjera që lidhen me jetën dhe krijimtarinë e tij.
Muzeu “Dritëro Agolli” synon të ruajë dhe të përcjellë te brezat e rinj trashëgiminë e një prej emrave më të rëndësishëm të letërsisë shqiptare. Përmes objekteve personale, fotografive dhe dokumenteve, vizitorët do të kenë mundësinë të njohin jo vetëm krijimtarinë e tij, por edhe njeriun që mbeti i lidhur me vendlindjen, traditat dhe njerëzit e Devollit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
