Hapet në Tiranë Panairi i librit për fëmijë dhe të rinj

Në ambientet e sheshit Rekreativ në Pazarin e ri në kryeqytet po mbahet “Panairi i librit për fëmijë dhe të rinj”.

Në edicionin e parë të panairit që mbahet në datat 24-27 qershor dhe i cili synon të shndërrohet në traditë po marrin pjesë shtëpitë botuese shqiptare të cilat kanë investuar në botimin e librave për fëmijë.

Ky aktivitet zhvillohet për herë të parë në vendin tonë dhe për këtë shkak ka tërhequr mjaft vëmendje nga fëmijët por edhe nga prindërit e tyre të cilët kanë pasur interes në lidhje me librat dhe titujt të cilët fëmijët e tyre duhet të lexojnë sidomos gjatë periudhës së pushimeve.

Sipas organizatorëve, shtëpitë botuese kanë bërë edhe ulje çmimesh për librat e tyre, në këtë rast nga 10 deri 30 për qind.

Ky panair organizohet nga Qendra e Librit për Fëmijë me mbështetjen e Bashkisë së Tiranës dhe është i dedikuar për botimet për fëmijët dhe të rinjtë, çdo ditë nga ora 9:00 e mëngjesit deri në 21:00 të mbrëmjes qëndron i hapur. 

Gjatë ditëve të panairit do të ketë edhe takime të shkrimtarëve dhe përkthyesve me lexuesit, që do të organizon prej disa shtëpive botuese që veprojnë në këtë fushë.