DPA: Kafe “Kursal”, ishulli europian i Tiranës së viteve ’30

 Drejtoria e Përgjithshme e Arkivave ka publikuar sot një imazh kartoline për kafenenë dhe restorantin e famshëm të Tiranës së viteve ‘30, kafe- “Kursal”.

“A e dinit se Kafe Kursal, një nga kafe-restorantet më të njohura të gjysmës së parë të shek. XX në Tiranë, emrin e kishte marrë nga klinikat kurative të Europës veriore?, thotë në postimin e saj DPA.

Kafe “Kursal” ishte një ishull evropian i Tiranës së viteve ’30, si për nga arkitektura e arredimi, po edhe për shërbimin e lartë! Ndodhej aty ku kryqëzohen rruga e Durrësit dhe e Kavajës, pranë ish-Parlamentit (sot Teatri i Kukullave).

"Emri i kafenesë nuk na thotë asgjë në shqip, por po të mendohemi pak, “Kursal” gjen gjegjësin e vet “kuursaal” të gjermanishtes, që në Europën veriore përdoret për banjat termale dhe mjediset kurative lidhur me to. Sigurisht, Kursali ynë nuk ka asnjë lidhje me kuptimin fillestar të fjalës. U ndërtua në fundvitet ’20 dhe ishte një ndërtesë njëkatëshe, me dy kulla në pjesën perëndimore, të stilit japonez. Lokali frekuentohej kryesisht nga elita e kohës, politikanë, ministra, deputetë, intelektualë, por edhe personel i huaj, i akredituar në kryeqytet, si dhe tregtarë, vendas dhe të huaj”, thuhet në njoftimin e DPA-së.

Në vitin 1938, në kafe “Kursal” u hap një sallon i veçantë për shkollë vallëzimi modern nga prof. Stathi dhe në mjediset e tij janë hapur ekspozita pikture të artistëve shqiptarë. Pas Luftës II Botërore u rrafshua si trashëgimi borgjeze, duke rrafshuar, simbolikisht, edhe atë çikë kurim shpirti që mund të gjenin frekuentuesit e barit në kohën e rendit të ri politik që po agonte.

Imazhi kartolinë i kafes „Kursal“ ruhet në Fototekën e Arkivit Qendror Shtetëror, fotografuar nga tarraca e ndërtesës së dikurshme të Bashkisë së Tiranës. Aeroplani mbi të është montazh artistik, për t’i dhënë pamje idilike-moderne peizazhit të qytetit të asaj kohe.