Ndërron jetë këngëtari Qemal Kërtusha

Ka ndërruar jetë në moshën 90-vjeçare këngëtari Qemal Kërtusha, i vlerësuar me titullin ‘Artist i Merituar’.

Qemal Kërtusha është fitues i medaljeve të arta në takimet e estradave si në Tiranë, Peshkopi e Shkodër.

Me një zë krejt të veçantë dhe me mundësi të pakufizuara vokale, diapazoni i tij shtrihet nga muzika popullore, muzika e lehtë, romancat, kënga partizane, kantata e deri tek ajo më e vështira, opera.

Në vitin 1962 është pjesëmarrës i festivalit të parë të këngës në Radio, ku nderohet me çmime për të tria këngët; “Fëmija i parë”, “Vashëzo” dhe “Mos më qorto”.

Në repertorin e tij numërohen mbi 1000 këngë të kënduara nëpër skenat tona, apo të incizuara në Radio Tirana. Në vitin 2008 i është akorduar titulli “Qytetar Nderi” i Durrësit. Qemal Kërtusha ka qenë dhe mbetet një figure emblematike e këngës durrake.

Dallon për çmimet e fituara në shtatëmbëdhjetë festivale rresht. Në vitin 1963 ai përgatit dhe jep me sukses të parin koncert recital me këngë nga festivalet e muzikës së lehtë. Në vitin 1968 merr pjesë në operan “Bijtë e Skënderbeut”. Duke parë vlerat e mëdha artistike dhe njerëzore të tij, në vitin 1968 i akordohet titulli “Artist i Merituar”.

Homazhet për të ndjerin zhvillohen në Hollin e Qendrës Kulturore "A.Mosiu" (Teatri A.Moisiu), ditën e enjte datë 10 mars në orën 10 - 11.