Për të gjashtin vit radhazi po vijojnë kërkimet dhe gërmimet arkeologjike në sitin e njohur palafit "Lin 3" në Pogradec, i cili cilësohet si vendbanimi më i vjetër liqenor në mbarë Evropën.
Një ekip i përbashkët me arkeologë shqiptarë dhe të huaj po kryen kampionime të reja të shtresave kulturore, me qëllim kryerjen e analizave të thelluara shkencore në laboratorët më prestigjiozë evropianë.
Drejtuesi i grupit të arkeologëve shqiptarë, Dr. Adrian Anastasi, bëri me dije se gjatë këtij viti kërkimet kanë arritur të konfirmojnë se vendbanimi shtrihet në një sipërfaqe prej rreth 6 hektarësh.
Ky zbulim e pozicionon zyrtarisht sitin e Linit si vendbanimin palafit më të madh në të gjithë rajonin e Ballkanit.
Anastasi nënvizoi se në kontekstin ndërkombëtar, ky sit mban interesin më të lartë shkencor në Evropë, ndërsa po përdoren metodologji dhe teknologji studimi nga më të avancuarat në fushën e arkeologjisë. Gërmimet nënujore dhe laboratorët evropianë
Nga ana tjetër, Martin Hinz nga Universiteti i Bernës u ndal te rëndësia e gërmimeve nënujore dhe kombinimi i tyre me studimet gjeofizike në breg të liqenit, të cilat po ndihmojnë në ndarjen e saktë të pjesës tokësore nga ajo nënujore e sitit.
Ndër të tjera, kampionët nga shtresat kulturore dhe ato nga palafitet do të testohen në laboratorët e Bernës, Oksfordit, Kielit (Gjermani) dhe Kopenhagës, në Danimarkë.
Vendbanimi palafit i Linit ka ndryshuar tashmë hartën e Evropës, duke sjellë të dhëna që prej Neolitit të Mesëm deri në Eneolit.
Ndërsa kërkimet arkeologjike pritet të vijojnë me gërmime dhe kërkime edhe në vitet e ardhshme. Saktësohet se sitet arkeologjike nënujore të zbuluara nga arkeologët shqiptarë dhe të huaj janë pjesë e trashëgimisë së UNESCO-s.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
