Një komedi muzikore e stilit “One Man Show” është ajo që sjell këto ditë para publikut në Teatrin Eksperimental “Kujtim Spahivogli” artisti Herion Mustafaraj.
“Prapaskena e Fatit” titullohet shfaqja, në qendër të të cilës është një teknik pianosh në moshë të thyer. Xha Fati, me origjinë shqiptare, vjen në prapaskenat e një Teatri në Broadway të New York-ut, për të akorduar pianon që ndodhet në dhomën e zhveshjes të një artisti me famë boteëore. Xha Fati futet në jetën e këtij artisti nëpërmjet sendeve personale që ndodhen në këtë dhomë dhe shfaq talentin e tij të fshehtë tek spektatorët.
Mes dy botëve të ndryshme, Shqipërisë dhe Amerikës , ai gjen probleme të njëjta sociale e shoqërore. Por pse duhet që spektatorët të vijnë ta shohin këtë shfaqje dhe çfarë i ka dhënë nga vetja këtij personazhi vetë aktori Mustafaraj?
Shfaqja ka dhe elementët e vet të stand-up it dhe në të, Mustafaraj ka bashkuar elementët e tij më të forta në aktrim: plastikën dhe interpretimin në instrumente.
Me autorësi të Mustafarajt, regji të Endri Çelës dhe skenografi të Bledar Gercalliut, “Prapaskena e Fatit” është shfaqur prej disa netësh në teatër, për të vijuar edhe më 14-15 dhe 16 nëntor.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
