Muzeu i Krimeve të Luftës merret përsipër nga qeveria “Kurti”

Një muze dedikuar viktimave dhe përvojave të luftës është në planet e qeverisë së Prishtinës.

Në programin qeverisës 2020-2023 është parashikuar ndërtimi i Muzeut të Krimeve të Luftës, krahas atij të Historisë dhe të Arteve Bashkëkohore.

Po ashtu, qeveria e re parashikon të zhvillojë kornizën ligjore, si dhe do të përkujdeset për infrastrukturën e përgjithshme të objekteve me rëndësi historike dhe kulturore.

Ndërtimi i një muzeu që përkujton krimet e luftës në Kosovë është diskutuar disa herë vitet e fundit, por ende 20 vjet pas luftës nuk ka një të tillë.

Ndërtimi I një muzeu të tillë është propozuar dy vjet më parë dhe kanë qenë 3 lokacionet e diskutuara për ndërtimin e tij në Prishtinë.

Projekti i propozuar në 2018 ka qenë një ide e analistit dhe studiuesit Shkëlzen Gashi, ndërsa si vend i mundshëm është diskutuar lagjja “Ulpianë”, në Prishtinë.

Nuk dihet nëse muzeu i ri do të ndërtohet bazuar mbi këtë projekt-ide, megjithatë mbetet i rëndësishëm fakti se ai është tashmë në planet e qeverisë së Albin Kurtit.