Nisin “Netët e Muzikës Shqiptare”, koncerte dhe premiera në TKOBAP deri më 5 dhjetor

 Skena e Teatrit Kombëtar të Operës, Baletit dhe Ansamblit Popullor (TKOBAP) mirëpret sot nisjen e festivalit “Netët e Muzikës Shqiptare”. 

Ky aktivitet madhor kulturor do të shtrihet nga data 11 nëntor deri më 5 dhjetor, duke shndërruar Hollin Koncertor në epiqendrën e vlerave dhe identitetit tonë muzikor.

Programi i këtij edicioni do të ofrojë një ndërthurje organike mes traditës dhe risisë bashkëkohore, duke bërë bashkë kompozitorë e interpretues të njohur nga Shqipëria dhe Kosova.

Sipas njoftimit zyrtar të TKOBAP-së, festivali i kushtohet ruajtjes së identitetit kulturor dhe brezave të krijuesve që kanë pasuruar trashëgiminë shpirtërore shqiptare. 

Kalendari do të jetë i ngjeshur me takime të hapura, koncerte, premiera të reja dhe konferenca artistike.

Publiku do të ketë mundësinë të ndjekë krijimet fituese të Konkursit Kombëtar “Tish Daija”, të sjella në skenë nga artistët e TKOBAP-së.

Mbrëmja do të sjellë pjesë të magjishme nga emra të shquar si Hajg Zaharian, Maksim Shehu, Ajet Çekiçi, Ylli Ramzoti dhe Niko Boçi.

Nata hapëse do të kurorëzohet me interpretimin e "Kuartet Harqesh" nga kompozitori i madh Tish Daija, figurë që mban dhe emrin e konkursit.

Përveç "Netëve të Muzikës Shqiptare", trupat e Operës dhe Baletit kanë përgatitur një axhendë mjaft dinamike për pjesën e mbetur të muajit. Skena do të mbushet me opera, balet dhe krijimtari të re bashkëkohore.

Trupat e TKOBAP-së do të nisin turnetë ndërkombëtare, ku do të performojnë përpara publikut në Maqedoninë e Veriut dhe në Skoci, duke eksportuar vlerat më të mira të kulturës sonë në mbarë Evropën.