Vijon komunikimi në distancë mes kreyministrit Rama dhe presidentit Meta në lidhje me zgjedhjet vendore. Nga Himara, ku vijon takimet elektorale, kryeministri Edi Rama i ktheu përgjigje letrës së dërguar mbrëmjen e së enjtes nga presidenti Ilir Meta.
“Më kishte çuar edhe një letër mbrëmë, një letër dashurie që çuditërisht e çoi pasi u dogj. Dashuri me kod, reflekto se e shiko çfarë po ndodh dhe kujtonte dhe Ramiz Alinë që shtyu zgjedhjet. Po ai i shtyu se ishte gjithë shqiptaria e ngritur për të ndryshuar sistemin, sepse kështu si erdhi puna sot, që edhe Bujar Nishani krahasuar me baba Xhikën na dukej si Xhefersoni edhe Ramiz Alia na del burrë shteti. Po këtu cili popull është ngritur që kërkon shtyrjen? I atyre që hedh gurin e fsheh dorën apo i atyre që morën më qafë punonjësit e bashkisë?”, ka thënë Rama.
Ndërkohë, nuk ka vonuar përgjigjja e presidentit. Përmes llogarisë së tij në Facebook, Meta ka zgjedhur t’u drejtohet qytetarëve, duke i këshilluar të shmangin konfrontimet në 30 qershor, ditë që e quan dita e “zgjedhjeve socialiste”. Meta e shoqëron mesazhin e tij me një video që tregon atmosferën e zgjedhjeve gjatë regjimit komunist.
Mesazhi i Metës
Mirëdita të dashur qytetarë!
Nga dje, data kushtetuese e zgjedhjeve vendore është 13 tetor 2019.
Situata është e qartë dhe e padiskutueshme nga ana ligjore dhe kushtetuese.
Gjithsesi kryeministri po insiston për të shkuar në votime socialiste në datën 30 qershor 2019.
Ju këshilloj ta merrni atë me qetësi e mençuri, dhe të mos bini pre e provokimeve, sepse ato u shërbejnë vetëm atyre që duan të legjitimojnë kapjen totale të shtetit dhe instalimin e një regjimi njëpartiak.
Të dashur qytetarë,
T’i respektojmë dhe të mos konfrontohemi me të gjithë ata bashkëqytetarë që do të shkojnë në këto votime socialiste.
Konfrontimi dhe dhuna nuk i shërben Shqipërisë dhe së ardhmes së saj europiane, dhe sidomos bashkëjetesës sonë qytetare në çdo familje, në çdo lagje, në çdo fshat, në çdo komunitet dhe në të gjithë shoqërinë tonë.
Mos u nervozoni nga provokimet që do t’ju bëhen për t’ju çuar drejt dhunës.
Ndoshta e teproj, por për t’i shijuar tamam votimet socialiste dhe për t’ju rikthyer qoftë dhe për 1 ditë asaj periudhë 45-vjeçare, shoqërojini me dajre e daulle si njëherë e një kohë.
Ata vetë do votojnë, vetë do t’i numërojnë.
Të gjithë shqiptarët së bashku, në mënyrë demokratike, të fshehtë, të lirë dhe të ndershme do të zgjedhin vetëm në 13 tetor 2019.
Ndaj ju ftoj të ndiqni dhe këtë video për t’u çtensionuar sadopak në prag të kësaj fundjave interesante.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
