Policia e Tiranës thotë se ka vënë në pranga autorin e dyshuar kryesor të grabitjes së filialit të Postës Shqiptare në zonën e Kamzës.
Shërbimet e Komisariatit të Policisë Nr. 5, në Kamzë, në vijim të punës për goditjen e paligjshmërisë dhe kapjen e personave në kërkim, në vijim të veprimeve intensive hetimore, në bashkëpunim me Sektorin e Forcës së Posaçme Operacionale, bënë kapjen dhe arrestimin në flagrancë të 30-vjeçarit Elis Suçi, banues në Kamzë.
I riu akuzohet se më 18 prill, rreth orës 14:20, në bashkëpunim me shtetasin Algert Kurtin, 20 vjeç, i arrestuar një ditë më parë, nën kërcënimin e një arme, kanë marrë një shumë parash në filialin e postës Shqiptare në Kamzë.
Në cilësinë e provës materiale janë sekuestruar 1 milion lekë të rinj, ose 10 milionë lekë të vjetra, një aparat celular, një armë zjarri pistoletë dhe veshjet që autori dyshohet se i ka përdorur gjatë kryerjes së krimit.
Lidhur me këtë ngjarje hetimet janë në vijim, ndërkohë që materialet i kaluan Prokurorisë së Tiranës, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
