Mungesa e stabilitetit politik mund të godasë bizneset dhe të frenojë rritjen ekonomike. Banka e Shqipërisë parashikon që gjatë këtij viti, vendi do të njohë një rritje ekonomike të moderuar dhe shkaku kryesor për këtë është kriza politike e muajve të fundit. Guvernatori Gent Sejko, gjatë konferencës së radhës, deklaroi se përgjatë tre muajve të parë të vitit është regjistruar një rritje me 2.21 %, niveli më i ulët që prej vitit 2015.
“Rreziqet e kahut të poshtëm mbeten predominuese dhe janë forcuar më tej. Ato lidhen me ambientin e jashtëm, me ecurinë e kursit të këmbimit dhe ndikimin e tij në inflacion, me aftësinë që oferta për kredi do të ketë për t’iu përgjigjur përmirësimit të pritur të kërkesës, dhe së fundmi me situatën politike në vend. Zgjatja e mosmarrëveshjeve politike në vend do të reflektohet në klimën e biznesit dhe mund të godasë aktivitetin ekonomik”, është shprehur Sejko.
Ndërsa në lidhje me zhvlerësimin e euros gjatë muajve të fundit, Sejko është shprehur se Banka e Shqipërisë nuk do të ndërhyjë në treg. Aktualisht, monedha europiane ka arritur në kuotën e 122 lekëve, një rënie e cila është shoqëruar me efekte që janë reflektuar kryesisht te eksportuesit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
