Akuza për shpërdorim detyre/ Vetëdorëzohet në Drejtorinë e Tiranës Jaeld Çela, ish-drejtori i Policisë së Vlorës

Ish-drejtori i Policisë së Vlorës Jaeld Çela raportohet se është vetëdorëzuar në Drejtorinë e Policisë Tiranë.

Pas 3 vitesh në arrati Jaeld Çela është vetëdorëzuar në Drejtorinë e Policisë, ndërsa ishte shpallur në kërkim për akuzën e shpërdorimit të detyrës me qëllim trafikimin e lëndëve narkotike.

Në shtator 2019 Jaeld Çela është dënuar nga Gjykata e Krimeve të Rënda me 5 vite burg për akuzat e mësipërme, por që për shkak të gjykimit të shkurtuar dënimi është ulur në 3.4 vite burg. Çela ka shkuar në ambientet e Drejtorisë së Tiranës i shoqëruar nga avokati i tij, ndërsa për kapjen e tij ishte vënë në dispozicion dhe një shpërblim i majmë.

Ish-drejtori i Policisë së Vlorës ka qenë në të njëjtën çështje me ish-ministrin e Brendshëm Saimir Tahiri.

Në deklaratën e tij, përmes avokatëve, Çela është shprehur se po akuzohet si bashkëpunëtor të disa individëve që jo vetëm nuk i njeh dhe as nuk i ka parë ndonjëherë por që janë ndjekur penalisht dhe arrestuar kur ai vetë ka qenë nën drejtimin e Policisë së Qarkut Vlorë.

Faktin që është vetëdorëzuar në polici pas kaq kohësh, Çela thotë se e ka bërë nisur nga respekti për punën që ka bërë për më shumë se 17 vite në strukturën e Policisë së Shtetit.

 “Vendosa të paraqitem përpara trupit gjykues në këtë fazë të dhënies së drejtësisë.

Në këto 2 vite nuk i jam bindur një mase denigrimi ndaj meje (që prokurorët e kësaj çështjeje e quajtën masë sigurimi). Nuk më udhëhoqi në këtë veprim instikti i lirisë, por arsyeja dhe respekti për punën që kam bërë në mëse 17 vite në strukturat e Policisë së Shtetit.

Më udhëhoqi:

-Respekti për punonjësit e shumtë të policisë, vartës, kolegë dhe eprorë, me të cilët kam shërbyer vetëm bazuar në ligj;

-Arsimimi dhe formimi im si Punonjës Policie dhe si një njeri që po i nëpërkëmbej e drejta;

-E mbi të gjitha respekti dhe dashuria për familjen time, së cilës mund t’i kërkoj ndjesë vetëm pse isha bashkëkohës me një sistem drejtësie që nuk interesohet të japë drejtësi me vendimet e tij, por të performojë politikisht, përmes tyre. Nuk shkova në paraburgim edhe për një arsye tjetër: Do të “zhgënjeja” gjithë ata të fajshëm që Ligji Penal, synon përveçse t’i ndëshkojë, edhe t’i ndreqë, pasi kjo e dyta do dukej e parëndësishme, meqë në burg mund të hysh edhe kot. Kam qenë dhe mbetem i bindur në pafajsinë time sepse ajo mbështetet mbi të vertetën, drejt së cilës duhet të shkojë drejtësia….

Përgjatë gjithë kësaj periudhe mbi emrin tim është hedhur baltë nga të gjithë ata që kurrë nuk më kanë njohur, që kurrë nuk kanë pasur dëshirën të njohin të vërtetën dhe që e kanë gjithmonë të lehtë të ngrenë gishtin dhe të nëpërkëmbënin “prenë” e radhës. Prokurorët më donin “bashkëpunëtor” të ish-Ministrit Tahiri, ndërkohë që isha vartës dhe bashkëpunëtor në shërbim tē Ligjit.

Më kanë akuzuar si bashkëpunëtor të disa individëve që jo vetëm nuk i njoh dhe as parë ndonjëherë por që janë ndjekur penalisht dhe arrestuar kur unë isha nën drejtimin e Policisë së Qarkut Vlorë.

Në 57 fashikujt “të ashqëtuajtur voluminozë” emri im nuk rezulton askund, as në përgjime, as në bisedat e të hetuarve, as në ndonjë shkeljë procedurash apo ligji… përkundrazi shfaqet vetëm në shkresat që kam firmosur për të arrestuar dhe ndjekur penalisht shumë prej këtyre personave… Në këtë proçes, pa asnjë dyshim të arsyeshëm, asnjë fakt e aq më pak provë, prokurorët (në këtë rast, inkuizitorët) një “provë: e dhanë..: se sa i rëndësishëm është reformimi i drejtësisë, të mos stonojë me emrin që ka, të kërkojë dhe japë drejtësinë. Së fundi, edhe po i “falenderoj” prokurorët pasi gjithë ai privim lirie që më detyruan të kaloj, shoqëruar me mbështetjen e njerëzve të mi, qindra punonjësve të ndershëm të policisë, shokëve e miqve, më bënë të kuptoj se paska një gjë edhe më të rëndësishme se sa që njerëzit të të duan: që ata të të BESOJNË. Besimi që patën të gjithë në pafajësinë time, qe oksigjeni dhe arësyeja se përse do eci përpara. Jam krenar për të gjithë vitet që shërbeva në strukturat e Policisë së Shtetit, ku kam dhënë më të mirën time në të gjitha shkallët e karrierës mbështetur në ndershmërinë, humanizimin dhe profesionalizmin e lartë në kryerjen e detyrave të mia në shërbim të qytetarëve të vendim,”- mësohet të ketë thënë Çela.