Zyrtarët shëndetësorë në Mbretërinë e Bashkuar kanë paralajmëruar për një " rritje anormale" të numrit të rasteve dhe vdekjeve nga infeksionet me streptokokun A, një grup bakteresh që mund të shkaktojnë ethet e kuqe dhe shumë probleme të tjera shëndetësore, ndonjëherë serioze dhe të rrezikshme, me simptoma që ndryshojnë sipas organeve të prekura.
Raporti i fundit nga Agjencia e Sigurisë Shëndetësore në Mbretërinë e Bashkuar (UKHSA) zbulon se, gjatë pjesës së parë të sezonit 2022-2023, njoftimet e infeksionit janë shumë më të larta se ato të raportuara gjatë së njëjtës periudhë në pesë sezonet e fundit, përfshirë vitet para pandemisë Covid.
Në Angli, në veçanti, raste të etheve të kuqe të ndezur "vazhdojnë të mbeten më të larta se sa do të shihnim normalisht në këtë periudhë të vitit ”, saktëson Agjencia në përditësimin e situatës epidemiologjike.
Në periudhën midis 12 shtatorit dhe 20 nëntorit, u raportuan më shumë se 4,600 raste të etheve të kuqe - duke përfshirë 851 në javën 46 (14-20 nëntor) - krahasuar me një mesatare prej 1,246 rastesh në të njëjtën periudhë gjatë pesë viteve të mëparshme.
Numri i rasteve të sëmundjes streptokoku të grupit A invaziv, forma më e rëndë e infeksionit, ishte gjithashtu më i lartë se sa pritej, duke arritur në 509 në këtë pjesë të parë të sezonit, nga të cilat 73 në javën e 46.
Çfarë është streptokoku i grupit A?
Streptokokët e grupit A, janë baktere anaerobe fakultative Gram-pozitive, specia patogjene më e rëndësishme e të cilave është Streptococcus pyogenes. Konkretisht, S. pyogenes është një bakter hemolitik i tipit β, pra i aftë për të prodhuar toksina, njëra prej të cilave, streptolizina, e aftë të shkatërrojë qelizat e kuqe të gjakut.
Si të gjithë streptokokët, edhe ata të grupit A kanë një formë sferike (koke), karakteristikë e të cilave është formimi i kolonive të ngjashme me zinxhir. Këto janë baktere shumë ngjitëse, të cilat përhapen nga kontakti i drejtpërdrejtë me sekrecionet nga fyti ose hunda e individëve të infektuar (duke folur, kollitur ose teshtitur, e cila krijon pika të frymëmarrjes që përmbajnë bakteret) ose përmes lezioneve të infektuara të lëkurës.
Rreziku i infektimit është më i madh kur simptomat e infeksionit janë të pranishme, por edhe personat asimptomatikë mund ta transmetojnë atë, megjithëse infeksioni asimptomatik është shumë më pak ngjitës.
Streptokokët e grupit A mund të kolonizojnë fytin dhe lëkurën, dhe në shumicën dërrmuese të rasteve, infeksionet karakterizohen nga sëmundje me simptoma relativisht të lehta, si temperatura e lartë, dhimbje të fytit (faringit streptokoksik) dhe infeksione të lëkurës (impetigo) që prekin veçanërisht fëmijët.
Disa infeksione, veçanërisht nëse nuk trajtohen, mund të shkaktojnë komplikime të tilla si ethet reumatizmale (një inflamacion që prek nyjet, zemrën, lëkurën dhe sistemin nervor) dhe glomerulonefriti akut (një inflamacion i glomerulave, rrjetit të enëve të gjakut të veshkave).
Infeksioni gjithashtu mund të përhapet përgjatë enëve limfatike (duke shkaktuar limfangit) në nyjet limfatike dhe të shkaktojë komplikime purulente, si abscesi peritonsillar, otitis media, sinusiti dhe bakteremia. Sëmundje të tjera serioze të lidhura me infeksionin e Streptokokut të grupit A përfshijnë septikeminë, pneumoninë dhe, më rrallë, endokarditin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
