Rasti i parë në botë: Lind bebja me moshë vetëm 1 vit më e vogël se nëna

Ruajtja më e gjatë e një embrioni në ngrirje ka përfunduar me lindjen me sukses të një fëmije në nëntor, në Tenesi, SHBA.

Emma Wren Gibson, e ardhur në jetë më 25 nëntor, është rezultat i ngrirjes së embrionit më 14 tetor 1992.

Prindërit e Emës, Tina dhe Benjamin Gibson, mbetën të befasuar kur morën vesh moshën e embrionit.

“Unë jam 25 vjeçe. Ajo dhe unë mund të kishim qenë shoqe të ngushta”, tha nëna disa muaj më parë.

Ndërsa pas lindjes në një intervistë për CNN, ajo shprehet: “Doja thjesht një fëmijë. Nuk dua t’ia di nëse është një rekord botëror”.

Rasti konsiderohet i veçantë pasi deri tani, embrioni më i vjetër që ka përfunduar me një lindje të suksesshme ka qenë i ruajtur për 20 vjet.

Ema është një bebe vajzë e shëndetshme. Prindërit e saj thonë se ajo është dhurata më e mirë e Krishtlindjeve. Edhe pse nuk kanë të njëjtat gjene, nëna dhe babai i saj thonë se dashuria për të është e njëjta.

Ema është një embrion i ruajtur për 25 vjet, pasi u konceptua në laborator me materialin gjenetik të një çifti që nuk mund të kishin fëmijë në mënyrë natyrale.

Ndryshe këta fëmijë quhen “bebet e dëborës”, për shkak të kohës së gjatë që embrioni kalon i ngirë në laborator, në pritje për të ardhur në jetë.  / CNN /