Kanadaja vendos tarifë 100% për automjetet elektrike të prodhimit kinez

Kanadaja njoftoi të hënën se do të vendosë një tarifë 100% për importet e automjeteve elektrike të prodhuara në Kinë, në përputhje me tarifat amerikane të vendosura mbi ato që qeveritë perëndimore thonë se janë subvencionet e Kinës që i japin industrisë së saj një avantazh të padrejtë.

Njoftimi erdhi pas inkurajimit nga këshilltari i sigurimit kombëtar të SHBA, Jake Sullivan, gjatë një takimi me kryeministrin kanadez Justin Trudeau dhe ministrat e kabinetit të dielën.

Sullivan po bën vizitën e tij të parë në Pekin të martën.

Trudeau tha se Kanadaja do të vendosë edhe një tarifë prej 25% për çelikun dhe aluminin kinez.

Aktorë si Kina kanë zgjedhur t’i japin vetes një avantazh të padrejtë në tregun global.

Një nga automjetet elektrike kineze të importuara në Kanada është nga Tesla, e prodhuar në fabrikën e kompanisë në Shangai, megjithëse kompania amerikane mund të shmangë tarifën duke kaluar në furnizimin e Kanadasë nga fabrikat në SHBA ose Gjermani.

Markat kineze nuk janë ende një lojtar kryesor në Kanada. Megjithatë, gjigandi kinez i automjeteve elektrike BYD krijoi një entitet korporativ kanadez pranverën e kaluar dhe ka treguar se synon të përpiqet të hyjë në tregun kanadez që në fillim të vitit të ardhshëm.

Presidenti i SHBA Joe Biden vendosi në maj tarifa të reja të mëdha për automjetet elektrike kineze, bateritë e avancuara, qelizat diellore, çelikun, aluminin dhe pajisjet mjekësore.

“SHBA besojnë se një front i bashkuar, një qasje e koordinuar për këto çështje na sjell dobi të gjithëve,” u tha Sullivan gazetarëve të dielën.

Biden ka thënë se subvencionet e qeverisë kineze për automjetet elektrike dhe mallrat e tjera të konsumit sigurojnë që kompanitë kineze të mos kenë nevojë të nxjerrin fitim, duke u dhënë një avantazh të padrejtë në tregtinë globale.

Firmat kineze mund të shesin automjete elektrike për vetëm 12.000 dollarë.