Itali, arratisja e hajdutit shqiptarit nëpër fshatra përfundon pa sukses

Një 27-vjeçar shqiptar është arrestuar nga policia italiane pas akuzave për vjedhje dhe armëmbajtje pa leje. Gjatë një kontrolli rutinë të karabinierëve në San Tammaro, ata vunë re një makinë të dyshimtë që qarkullonte rreth e përqark zonës.

Kur filluan ndjekjen, makina “Lancia Lybra” në të cilën ndodhej shqiptari, shtoi shpejtësinë për t’u larguar. Pas ndjekjes për disa minuta, policia arriti të neutralizonte makinën e shqiptarit pasi ajo doli nga rruga për shkak të shpejtësisë së madhe, shkruan Napoli.it. Në rrugën “Santa Maria Capua Vetere”, karabinierët arrestuan Denis Demën, i cili nuk kishte një banesë fikse në Itali.

Gjatë kontrollit të bërë në makinë policia gjeti një sërë mjetesh të vjedhura, si edhe armë, laptopë, bizhuteri etj. Policia po vijon kërkimin për personin tjetër që ishte në makinë me shqiptarin por që arriti të arratisej.