Koalicioni qeverisës i Gjermanisë është përfshirë nga një debat nëse përpjekjet e vendit për të rritur numrin e ushtarëve duhet të përfshijnë mundësinë e shërbimit të detyrueshëm ushtarak.
Konservatorët Kristian-demokratë po debatojnë me Social Demokratët e qendrës së majtë (SPD) brenda koalicionit qeverisës mbi formën e projektligjit të ri ushtarak të vendit, Aktit të Modernizimit të Shërbimit Ushtarak, i cili do të paraqitet në Kabinet më 27 gusht.
Për momentin, kancelari Friedrich Merz po u shmanget përplasjeve, ndonëse disa kristianë-demokratë duan ta tërheqin kancelarin në këtë debat.
Projektligji është përpjekja e Ministrit të Mbrojtjes Boris Pistorius, politikan i SPD, me qëllim adresimin e mungesës kronike të personelit në Bundeswehr pa rikthyer plotësisht rekrutimin e detyrueshëm ushtarak, të cilin Gjermania e pezulloi në vitin 2011.
Sipas propozimit, të gjithë burrat në moshë rekrutimi do të duhet të regjistrohen dhe t'i nënshtrohen një procesi shqyrtimi, por vetëm një numër i caktuar do të thirret për shërbim. Gratë mund të bëhen vullnetare.
Qeveria shpreson të rekrutojë rreth 5 mijë ushtarë vullnetarë shtesë çdo vit, me afate shërbimi deri në 23 muaj. Çështja kryesore është se shërbimi i detyrueshëm do të hyjë në fuqi vetëm nëse parlamenti voton për të në një vendim të veçantë.
Konservatorët duan një ligj më të ashpër
Kristian-demokratët duan që ligji të shkojë më tej duke futur një vit shërbimi të detyrueshëm, i cili do të përfshinte shërbimin e detyrueshëm ushtarak si një opsion, së bashku me alternativat civile si puna në spitale ose shkolla.
Ata gjithashtu e hedhin poshtë idenë e kërkesës për një votim parlamentar për rekrutimin ushtarak në një krizë, një parakusht në legjislacion.
“Nëse rekrutimi ushtarak aktivizohet vetëm në një krizë të përkeqësuar ushtarake, ai bëhet një mjet reagimi dhe jo sigurues”, tha për WELT udhëheqësi konservator i politikës së jashtme dhe të mbrojtjes, Norbert Röttgen.
Röttgen akuzoi Pistoriusin, i cili i përket SPD-së, se “po zbaton vetëm njërën anë të kompromisit duke u përqendruar vetëm te vullnetarizmi”, pa objektiva të qarta ose një mekanizëm automatik për të kaluar në rekrutim ushtarak nëse numri i vullnetarëve bie. “Kjo nuk do të funksionojë - duhet të ketë përmirësime të detyrueshme”, tha ai.
Mospajtimi i tij mbështetet edhe nga kristian-demokratë të tjerë. Këshilltarë të shumtë parlamentarë i thanë POLITICO-s se dyshojnë që projektligji, siç është hartuar, mund të fitojë mbështetjen politike të nevojshme për t’u miratuar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
