Finalizohet operacioni i policisë Himarë, i koduar “Double 3”, për goditjen e veprimtarisë kriminale të dhënies ndihmë shtetasve të huaj, për kalim të paligjshëm të kufijve.
Operacioni u zhvillua nga Komisariati i Policisë Himarë, në bashkëpunim me ata të Vlorës dhe Komisariatin e Policisë nr.5, Tiranë.
Gjatë këtij operacioni u vu në pranga Klodian Murati, 27 vjeç, banues në Tiranë, për veprën penale “Ndihma për kalim të paligjshëm të kufijve”.
Në dalje të Bypass-it Himarë, shërbimet e policisë, pas informacioneve të siguruara në rrugë operative, i kanë bërë shenjë për të ndaluar Muratin, i cili drejtonte automjetin tip furgon.
27-vjeçari nuk i është bindur urdhrit të punonjësve të policisë për të ndaluar, por është larguar me shpejtësi.
Shërbimet e policisë janë vënë në ndjekje të automjetit që drejtohej nga 27-vjeçari dhe kanë evidentuar disa metra më tutje, automjetin tip furgon, të braktisur.
Gjatë kontrollit në automjet, shërbimet e policisë kanë gjetur 33 emigrantë të paligjshëm nga vendet MENA, të cilët ky shtetas po i transportonte kundrejt fitimit.
Në vijim të operacionit, pas shkëmbimit të informacionit me DVP në qarqe dhe falë një pune të mirëkoordinuar policore, pas disa orësh nga braktisja e automjetit, në Laprakë, nga shërbimet e Komisariatit të Policisë nr.5, Tiranë, është bërë e mundur kapja e shtetasit Klodian Murati.
Gjithashtu gjatë kontrollit fizik të tij iu gjet dhe iu sekuestrua në cilësinë e provës materiale, një sasi e dyshuar lënde narkotike e llojit kokainë.
Lidhur me këtë ngjarje, materialet iu referuan Prokurorisë Vlorë, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
