Pandemia i ndryshoi ritualet e ceremonive mortore. Por ajo që ka ndryshuar në masë të madhe është edhe mënyra e varrimit. “Eternal Reefs”, një kompani me bazë në Florida thotë se interesi për shërbimin e saj mjaft të pazakontë është rritur si rezultat i pandemisë.
Që nga viti 1998, kompania i kthen eshtrat e të vdekurve në formacione shkëmbinjsh artificialë në fund të oqeanit. E bën këtë duke shtuar hirin e tyre në një përzierje betoni miqësore me mjedisin.
"Pandemia ka përshpejtuar interesin, absolutisht," thotë George Frankel, shefi ekzekutiv i Eternal Reef. "Unë besoj se pandemia i ka bërë njerëzit më të hapur ndaj një lloji të ri varrimi, larg atij tradicional”.
Që nga viti i kaluar, më shumë se 2 000 shkëmbinj nënujorë të kompanisë janë vendosur në 25 vende larg bregut lindor të SHBA.
Pandemia Covid-19 u ka marrë të dashurit miliona njerëzve në të gjithë botën, duke i bërë të reflektojnë më shumë për vdekjen. Kjo i ka nxitur shumë të mendojnë në mënyrë krijuese për atë që duan të bëjnë me trupin ose hirin e tyre pasi të kenë vdekur.
Për njerëzit që duan që eshtrat e tyre të qëndrojnë në tokë, biznesi me qendër në Seattle, Recompose ka zhvilluar një teknologji "kompostimi njerëzor" që i kthen trupat e pajetë në dhé.
Trupi vendoset në një cilindër të mbyllur çeliku, së bashku me copa druri, kashtë dhe copa nga një bimë bishtajore. Nga jashtë kontrollohen nivelet e dioksidit të karbonit, azotit, oksigjenit, nxehtësisë dhe lagështisë në tub, për të mundësuar që mikrobet dhe bakteret të veprojnë.
Pas 30 ditësh procesi i kompostimit ka përfunduar dhe 84,951 centimetra kub tokë hiqen nga cilindri për t'u ajrosur për disa javë. Rikompostimi sugjeron që ky dhe më pas të shkojë në një pyll konservimi në shtetin Uashington apo t’u jepet familjarëve.
Katrina Spade, e cila krijoi biznesin në 2017, thotë se ajo ka parë një rritje të madhe të aplikacioneve për programin e saj me parapageës që nga fillimi i pandemisë.
Ndërsa disa njerëz dëshirojnë që t'i vizitojnë të afërmit e tyre në varreza, të tjerë duan që diçka më dramatike të ndodhë me hirin e tyre.
Firma amerikane Celestis, prej 20 vitesh dërgon hirin e të vdekurve në hapësirë.
Përmes misioneve hapësinore, njerëzit mund të dërgojnë hirin e të dashurve në orbitë dhe më gjerë.Këtë vit, sektori global i shërbimeve të kujdesit për vdekjen pritet të kapë vlerën 110 miliardë dollarë, sipas firmës së hulumtimit të tregut The Business Research Company. Parashikimet janë që kjo do të rritet në 148 miliardë dollarë deri në vitin 2025.
Përgjatë viteve të fundit, djegia është zgjedhur gjithnjë e më shumë si opsion alternativ i varrimit. / BBC /
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
