Këshilli i Ministrave mori sot një sërë vendimesh të rëndësishme në fusha të ndryshme.
Sipas njoftimit të Agjencisë për Media dhe Informim, qeveria miratoi disa masa, ndër të cilat spikat përcaktimi i kritereve, procedurave dhe metodologjisë së vlerësimit për dhënien e licencave për bastet sportive online.
Një tjetër vendim i rëndësishëm është shpallja si pasuri kulturore e paluajtshme, me statusin “Ansambël arkitektonik urban”, e një zone në fshatin Lin.
Gjithashtu, disa zona në bashkitë Bulqizë, Pukë dhe Lezhë u shpallën “Zona me përparësi për zhvillimin e ekonomisë malore”, me qëllim nxitjen e zhvillimit ekonomik në këto territore.
Qeveria miratoi edhe Planin Kombëtar të Veprimit të Garancisë Evropiane për Fëmijët 2026–2030, si dhe i dha mendim Kuvendit për një projektligj joqeveritar që lidhet me administrimin e pasurive të sekuestruara dhe të konfiskuara.
Në fushën e energjisë, u miratua ndërtimi i dy centraleve fotovoltaike në bashkitë Kolonjë dhe Devoll. Këto projekte nuk janë objekt koncesioni dhe nuk përfitojnë nga masa mbështetëse. Njëri do të ndërtohet nga shoqëria “TEKNO FIRE” në njësinë administrative Mbreshtan, ndërsa tjetri nga “KRONOS KONSTRUKSION” në afërsi të fshatit Vërnik.
Po ashtu, Këshilli i Ministrave vendosi dhënien e një pensioni të posaçëm shtetëror për Fatmir Qeramudin Cukën, në masën e dhjetëfishit të pensionit social, në kuadër të politikave për vlerësimin e meritave individuale.
Vendimet kryesore:
Përcaktimi i kritereve dhe procedurave për licencimin e basteve sportive online
Shpallja e një zone në Lin si pasuri kulturore “Ansambël arkitektonik urban”
Shpallja e zonave me përparësi për zhvillimin e ekonomisë malore në Bulqizë, Pukë dhe Lezhë
Miratimi i Planit Kombëtar të Veprimit të Garancisë Evropiane për Fëmijët 2026–2030
Dhënia e mendimit për projektligjin mbi administrimin e pasurive të sekuestruara dhe të konfiskuara
Miratimi i ndërtimit të dy centraleve fotovoltaike në Kolonjë dhe Devoll
Dhënia e pensionit të posaçëm shtetëror për Fatmir Qeramudin Cukën
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
