Një tentativë arratisjeje nga dhomat e sigurisë së zakonshme në burgun e Fushë Krujës është parandaluar ditën e djeshme.
Ministria e Drejtësisë informon se janë prerë hekurat e dritares dhe se ngjarja është zbuluar më 1 maj dhe është parandaluar nga grupi i sigurisë në Institucionit të Ekzekutimit të Vendimeve Penale Fushë Krujë
Sipas informacioneve të para, "Në datë 01 maj 2018, rreth orës 11:52, gjatë kontrollit të ushtruar nga grupi i sigurisë, në godinën B (siguria e zakonshme), në njërën prej dhomave të katit të parë është konstatuar dëmtim i hekurave të zgarës së dritares së kësaj dhome".
Dhoma ku ndodheshin të burgosurit ishte e sigurisë së ulët dhe shpesh herë ishte përdorur për akomodimin e personave të paraburgosur. Pesë personat që ndodheshin aktualisht në këtë dhomë, ishin aty prej jo më shumë se 15 ditësh.
Menjëherë janë marrë masa për sigurimin e të dënuarve që ndodheshin në këtë dhomë si dhe kanë nisur hetimet për zbardhjen e ngjarjes.
Në qeli ndodheshin të dënuar për dhunë në familje dhe të burgosurit u transferuan për në burgun e Peqinit dhe Drenoves. Në vendin e ngjarjes kanë shkuar grupe inspektimi nga Drejtoria e Përgjithshme e Burgjeve si dhe nga Shërbimi i Kontrollit të Brendshëm të Sistemit të Burgjeve, ndërsa është njoftuar edhe Komisariati i Policisë së Fushë Krujës.
Hetimet e mëtejshme do të bëjën të mundur zbardhjen e plotë të ngjarjes dhe vënien përpara përgjegjësisë ligjore për autorët.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
