Bushka: Kam miqësi me Erjonin dhe Ajolën, por kurrë nuk kam mbuluar të vërtetën

<p>Deputetja e PS, Klotilda Bushka, reagoi përmes rrjeteve sociale në lidhje me njoftimin për hetimin e SPAK ndaj saj. Bushka shprehet se ka një lidhje me çiftin Veliaj-Xoxa, por nuk ka lidhje me çështjen për të cilën ka nisur hetimi.</p> <blockquote> <p><em>Jam “pa fjalë” prej 24 orësh që figurokam edhe unë në listën e gjatë të emrave që ka grumbulluar SPAK-u për të lënë Tiranën pa kryetar bashkie, bazuar në dyshime të lidhura me njëra-tjetrën si në një film, për të cilat maksimumi i akuzave për Erjon Velinë dhe Ajola Xoxën, mund të ngrihej në gjendje të lirë. Por kjo është një temë tjetër. </em></p> <p><em>Pyetja ime është ku hyj unë në këtë mes dhe pse duhet të më takonte sipas SPAK-ut balta që i shoqëron këto goditje të tij, për të cilat më shpejt vihen në dijeni disa gazetarë “specialë”, se sa kush përgojohet pa u pyetur fare? </em></p> <p><em>A jam unë shoqe që nga fëmijëria me Ajola Xoxën? </em></p> <p><em>Po, dhe s’kam për ta mohuar, as harruar kurrë. </em></p> <p><em>A jam unë edhe shoqe me Erjonin? </em></p> <p><em>Po, që në rininë e parë dhe jam krenare edhe për miqësinë me Erjonin dhe për gjithçka ai ka bërë për Tiranën. </em></p> <p><em>A kam folur me Ajolën gjatë këtyre muajve të ferrit që ajo po kalon, duke u gjendur nën një presion të frikshëm mediatik, përveçse në një proces që për mua ka shumë pikëpyetje? </em></p> <p><em>Po, kam folur dhe do flas sa herë të më kërkojë apo ta kërkoj. Por kurrë për të mbuluar të vërtetën, sepse halli s’ka qenë asnjëherë se si e vërteta që Ajola ka ndarë me mua të mbulohet. Halli ka qenë dhe sot është edhe më i madh, se si e vërteta e Ajolës të mos mbulohet. </em></p> <p><em>Thënë sa më lart, kam kërkuar të dëgjohem nga grupi parlamentar. Kjo është vërtetë e tepërt dhe mezi pres të dëgjohem edhe nga ata që kanë futur edhe emrin tim në një akt-hetimi, pa më thirrur asnjëherë.</em></p> </blockquote>