Reeker për TvT: Demokraci do të thotë të jesh pjesë e institucioneve, SHBA do të monitorojë (VIDEO)

Asistentsekretari për Euroazinë në Departamentin Amerikan të Shtetit, ambasadori Philip T. Reeker, thotë se marrëveshja e 5 qershorit, e cila u miratua sot nga Parlamenti shqiptar, është një lëvizje në drejtimin e duhur.

I pyetur nga korrespondenti i TvT në Nju Jork, Robert Papa, lidhur me reformën elektorale në Shqipëri, z. Reeker tha se mbetet domosdoshmëri përfshirja në institucione e të gjitha palëve politike.

Ai theksoi se SHBA do të vijojë ta monitorojë këtë aspekt si bazën mbi të cilën ngrihet demokracia.

Kryeministri Rama ka prishur marrëveshjen e reformës elektorale që u firmos në ambasadën tuaj. A do ta tolerojë ende Departamenti i Shtetit kryeministrin shqiptar?

Ne e mirëpritëm marrëveshjen dhe e cilësojmë një hap në drejtimin e duhur. Jemi të kënaqur me punën e ambasadores Kim, e cila ia ka dalë të japë ndihmën e saj që të ecet në këtë drejtim. Shqipëria është vend aleat i NATO-s, kandidate për anëtarësim në BE. Unë kam disa vite që jam përfshirë në atë pjesë të botës. Ka zhvillime të tjera në Shqipëri. Është shumë e rëndësishme për ne që të shohim që të gjitha palët e spektrit politik të jenë pjesë e institucioneve. Kjo është demokracia dhe në këtë aspekt ne do të anagazhohemi, do ta monitorojmë dhe do ta ikurajojmë.