Gjatë fillimit të kësaj jave si rezultat i mbizotërimit të motit të keq edhe në Qarkun e Elbasanit kanë rënë reshje të dendura shiu, breshëri dhe dëborë, veçanërisht në zonat e thella malore të Librazhdit, Përrenjasit, Gramshit dhe Elbasanit.
“Kapriçot”e motit kanë krijuar vështirësi të përkohshme për lëvizjen me automjete në disa fshatra ndërsa situata për pak kohë ka kërkuar ndërhyrjen e shpejtë të autoriteteve dhe shërbimeve emergjente.
Në Fushë Studën të Librazhdit, mëngjesin e kësaj të marte, trashësia e dëborës ka arritur 3-5 cm, sipas Albert Kalecit, Kryetar i Njësisë Administrative Steblevë.
Ndërsa ë Parkun Kombëtar Shebenik trashësia e dëborës ka qenë më e madhe duke arritur nga 15 deri në 25 cm. Situata ka qenë më e rënduar në fshatrat e tjerë të qarkut Elbasan që ndodhen mbi 900 metra lartësi mbi nivelin e detit ku trashësia e dëborës ka shkuar deri në 10 cm e shoqëruar edhe me ngrica.
Megjithatë për momentin reshjet kanë pushuar dhe temperaturat janë ulur ndjeshëm duke krijuar një ndjesi të fortë të dimrit krahasuar me ditët e ngrohta të verës. Në lidhje me pasojat e motit të keq burime zyrtare nga emergjencat civile raportojnë se nuk ka pasur probleme serioze në qarkun e Elbasanit si rezultat i kushteve atmosferike të dy ditëve të fundit.
Përveç disa defekteve të shkaktuara në rrjetin shpërndarës të energjisë elektrike të cilat u riparuan gjatë ditës së djeshme nuk ka pasur probleme të tjera.
Kompanitë e mirëmbajtjes së rrugëve janë angazhuar në pastrimin e akseve të rëndësishme dhe ruajtjen e sigurisë së përdoruesve të këtyre rrugëve veçanërisht në segmentet e rrezikshme sikurse janë " Kthesat e Murrashit", "Kthesat e Dragostunjës" e "Kthesat e Pishkashit" si edhe në zonat malore që janë më të prekura nga reshjet e borës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
