Kurti: Të lirohen tre zyrtarët e policisë të rrëmbyer nga ushtria serbe! Ndërkombëtarët të dënojnë këtë akt agresioni

Kryeministri i Kosovës Albin Kurti ka kërkuar lirimin e menjëhershëm të tre zyrtarëve të policies që dyshohen të të rrëmbyer nga ushtria serbe. Kurti i ftoi faktorët ndërkombëtarë që të dënojnë këtë akt agresioni të Serbisë. Në reagimin e Kurtit në rrjetet sociale thuhet: “Tre zyrtarë të policisë së Kosovës janë rrëmbyer sot në Leposaviq në vendin ku dikur kishte një rrugë ilegale të kontrabandës e që ndodhet rreth 300 metra në brendësi të territorit të shtetit tonë. Dyshojmë që ata janë rrëmbyer nga ushtria e Serbisë, qartazi si hakmarrje e Serbisë për arrestimin e djeshëm të kriminelit famëkeq Millun Millenkoviq - Lune, i cili paraqet një ndër krerët e krimit të organizuar dhe kontrabandës. Policia e Kosovës është treguar tejet e vetëpërmbajtur këto javët e fundit. Hyrja e forcave të Serbisë në territorin e Kosovës është agresion dhe synim për eskalim dhe destabilizim. Kërkojmë lirimin e menjëhershëm të tre zyrtarëve të rrëmbyer policor dhe ftojmë faktorët ndërkombëtarë që të dënojnë këtë akt agresioni të Serbisë”.