Lavrov: Rusia nuk do të mbështetet më tek Perëndimi në politikën energjetike

Rusia nuk do të mbështetet më tek partnerët perëndimorë në politikën e saj energjetike, tha të premten ministri i Jashtëm rus Sergej Lavrov.

Sigurisht, lufta që ne po përpiqemi t’i japim fund dhe që u nis nga Perëndimi kundër nesh duke përdorur ukrainasit, ka ndikuar në politikën ruse, duke përfshirë politikën e energjisë.

Ajo që ka ndryshuar është se ne nuk do të mbështetemi më në asnjë partner perëndimor. Nuk do t’i lëmë të hedhin më në erë tubacionet e gazit.

Kur Rusia kërkoi një hetim mbi shpërthimet e Nord Stream, kërkesa u refuzua menjëherë. Amerikanët e quajtën marrëzi dhe kur Seymour Hersh publikoi gjetjet e tij, ju mund të shihni reagimin e europianëve dhe amerikanëve.

Lavrov shtoi se Gjermania u poshtërua në çdo mënyrë, fizike, morale dhe vuri në dukje se të gjitha veprimet aktuale të SHBA synojnë ta bëjnë Europën një “lojtare vartëse” ndaj Uashingtonit.

Politika energjetike e Rusisë do të ketë prioritet partnerë të besueshëm. India dhe Kina janë padiskutim midis tyre.

Më 8 shkurt, gazetari investigativ amerikan Seymour Hersh botoi një artikull në të cilin pretendonte, duke cituar burime, se zhytësit e marinës amerikane kishin vendosur pajisje shpërthyese nën tubacionet e gazit Nord Stream 1 dhe 2 nën mbulesën e stërvitjes BALTOPS në qershor 2022, dhe se norvegjezët i kishin aktivizuar bombat tre muaj më vonë.

Sipas gazetarit, vendimi për të kryer operacionin është marrë nga Presidenti amerikan Joe Biden personalisht, pas nëntë muajsh diskutime me specialistë të sigurisë së Shtëpisë së Bardhë.