Fillojnë punimet për "rijetësimin" e Piramidës në kryeqytet

Kanë filluar punimet për rijetësimin e piramidës në kryeqytet për ta bërë atë sërisht funksionale për qytetarët.

Piramida e Tiranës vijon të mbetet një pikë referimi për kryeqytetasit por prej kohësh e kishte humbur funksionin e saj si një prej ndërtesave më të veçanta në vend.

Më herët kryetari i bashkisë së Tiranës ka bërë edhe një prezantim të përgjithshëm të projektit, i cili do të ndryshojë tërësisht konceptin dhe funksionalitetin e kësaj godine.

Bëhet fjalë për një transformimin e saj në një qendër të inovacionit dhe teknologjisë, artit dhe kulturës në vend.

Historia e Piramidës së Tiranës fillon në vitin 1980 kur godina u dizajnua për të kujtuar jetën e diktatorit shqiptar, Enver Hoxha. Lideri komunist drejtoi vendin nga viti 1944 deri në vdekjen e tij në vitin 1985 duke futur vendin në një izolim të thellë nga pjesa tjetër e botës. Shumë shpejt, pas vdekjes së tij, një grup arkitektësh, të drejtuar nga vajza e Hoxhës, Pranvera dhe bashkëshorti i saj Klement Kolaneci, dizajnuan strukturën e Piramidës.

Godina u hap në vitin 1988 si muzeu ”Enver Hoxha”. Në atë kohë përshkruhej si struktura më e shtrenjtë e ndërtuar ndonjëherë në Shqipëri. Megjithatë, qëllimi i saj për të nderuar diktatorin e Shqipërisë pati një jetë të shkurtër. Pas rënies së komunizmit në Shqipëri në vitin 1991, Piramida u shndërrua në një qendër kulturore duke nderuar Pjetër Arbnorin, një i mbijetuar nga kampet shqiptare dhe viktimë e regjimit. Gjatë viteve ’90, Piramida u bë gjithashtu pika më e nxehtë në Tiranë për jetën e natës dhe një vend ku të rinjtë shqiptarë mblidheshin dhe luanin gjatë verës.