Pas 146 vitesh, cirku më i famshëm në Amerikë, “Ringling Bros and Barnum & Bailey Circus” ka mbajtur performancën e tij të fundit në Nju Jork.
Pronarët e kompanisë thanë se, vendimi i vështirë ishte marrë për shkak të rënies së shitjeve të biletave dhe kostove të larta operative.
“Për sa i takon këtij institucioni të madh amerikan është një moment i trishtuar”, thanë drejtuesit. Për performuesit, kjo do të thotë edhe fundi i një komuniteti të ngushtë që jetonte në një tren mes spektakleve.
Performanca e fundit, e asaj që kompania e përshkruan si “shfaqja më e madhe në tokë”, është transmetuar drejtpërdrejt “online”.
Pak para shfaqjes, David Vassallo, një klloun në cirk tha se “Për çdo artist është një ëndërr të jetë pjesë e këtij spektakli, më i madhi mbi faqen e tokës. Unë nuk mund ta përshkruaj sa i lumtur ndihem, që jam pjesë e tij dhe jam i trishtuar, sigurisht, që do të duhet të zgjohem nga kjo ëndërr e mrekullueshme”.
“Ringling Bros” ishte cirku i fundit amerikan që udhëtonte me tren. Deri të dielën, treni i kompanisë ishte rezidenca kryesore dhe e parë për pjesën më të madhe të performuesve, që ishin mbledhur nga 13 vende të ndryshme.
Ndërkohë, aktivistët për të drejtat e kafshëve, që e kanë akuzuar “Ringling Bros” për abuzim me kafshët, kanë mirëpritur vendimin për mbylljen e kompanisë. Ata mbajtën një protestë në Nju Jork, duke mbajtur në duar parullat “Ne do t’iu mbyllim” dhe “Lamtumirë abuzues të kafshëve”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
