Ndarja mes Shqipërisë dhe Maqedonisë së Veriut në procesin e negociatave me Bashkimin Europian po kundërshtohet nga partia shqiptare në shtetin fqinj, Bashkimi Demokratik për Integrim, i drejtuar nga Ali Ahmeti. Përfaqësuesi i saj në qeveri, ministri i Jashtëm, Bujar Osmani thotë se është në interesin e të dyja shteteve që të mos ndahen në këtë proces.
“Në vitin 2019 të dy vendet ishin në pozicione të kundërta, kur ne duhej të lëviznim ndërsa Shqipëria nuk kishte mbështetjen e disa shteteve anëtare dhe më pas pyetja ishte nëse do të ndahej Maqedonia e Veriut nga Shqipëria. Konsideroj se është në interesin e të dyja vendeve që të qëndrojnë së bashku, sepse krijojnë një energji të fortë duke i dhënë dinamikë rajonit. Ky nuk është vetëm një proces demokratik, por edhe një proces politik.”
Qëndrimi i Osmanit ndryshon nga ai i shprehur disa muaj më parë nga kryeministri në largim Zoran Zaev, i cili ka deklaruar se Tirana nuk duhet të mbahet peng i konfliktit të Shkupit me Sofien.
Ndërkohë sinjale negative vazhdojnë të vijnë nga Bullgaria. I nominuari bullgar për kryeministër Kiril Petkov, teksa i dorëzoi Presidentit emrat e qeverisë së re, theksoi se Pozicioni bullgar mbetet i pandryshuar, ndonëse ka dëshirë për përmirësime.
Së fundmi, nga Zëvendëskryeministri i Maqedonisë së Veriut, Artan Grubi është njoftuar për një nismë nga Franca për arritjen e një marrëveshje me Bullgarinë, por pa dhënë më shumë detaje.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
