Negociatorët, pranë marrëveshjes së armëpushimit Izrael-Hamas

Izraeli dhe Hamasi janë në rrugën e duhur për të arritur një marrëveshje armëpushimi të zgjatur brenda dy javëve të ardhshme, ka raportuar New York Times, duke cituar zyrtarë të paidentifikuar amerikanë afër negociatave.

Marrëveshja e ndërmjetësuar nga SHBA mund të bëjë që Hamasi të lirojë pengjet e mbetura izraelitë në këmbim të ndalimit për dy muaj të sulmeve nga Forcat Izraelite të Mbrojtjes. 

Sipas burimeve, propozimet do të jenë pjesë e bisedimeve të sotme në Paris. Rreth 1,200 njerëz u vranë dhe rreth 240 u morën peng gjatë inkursionit në Izrael nga Hamasi më 7 tetor. 

Sipas ministrisë së shëndetësisë së Gazës, operacioni IDF, i nisur në përgjigje të bastisjes, deri më tani ka parë 26,422 palestinezë të vrarë dhe ka lënë 65,087 të tjerë të plagosur. 

Në fillim të kësaj jave, Gjykata Ndërkombëtare e Drejtësisë (ICJ) urdhëroi Izraelin të marrë të gjitha masat e nevojshme për të parandaluar gjenocidin në Gaza.

Hamasi liroi rreth gjysmën e pengjeve gjatë një armëpushimi njëjavor në nëntor. Sipas autoriteteve izraelite, grupi ende mban 136 persona, ndërsa rreth dy duzina robër besohet se janë vrarë në luftime.

Marrëveshja e re e armëpushimit do të ishte "më e shtrirë në kohëzgjatje" se ajo e mëparshme, pohuan zyrtarët. 

Në fazën e parë, e cila do të ndalonte armiqësitë për 30 ditë, gratë, të moshuarit dhe pengjet e plagosur do të lirohen nga Hamasi. Gjatë kësaj kohe, palët do të bien dakord për një fazë të dytë, e cila do të zgjaste armëpushimin edhe për një muaj në këmbim të lirimit të ushtarëve izraelitë dhe civilëve meshkuj.

Marrëveshja do të krijojë qasje të ndihmave humanitare në Gaza. Numri i palestinezëve që do të lirohen nga burgjet izraelite ende nuk është negociuar, por burimet e përshkruan atë si "një çështje të zgjidhshme".

Marrëveshja nuk do të jepte armëpushimin e përhershëm që Hamasi ka kërkuar, por zyrtarët shprehën besimin e tyre se pas një pauze dymujore sulmet izraelite në Gaza do të ishin më pak intensive. Armëpushimi do të sigurojë gjithashtu një dritare për diplomacinë që mund të lehtësojë një zgjidhje më të gjerë të konfliktit izraelito-palestinez.