Misioni i vëzhguesve të OSBE-ODIHR-it doli sot para mediave për të bërë publike rezultatet e para të vëzhgimit të procesit zgjedhor të ditës së djeshme. 330 vëzhgues nga 43 vende, duke përfshirë 255 vëzhgues afatgjatë dhe afatshkurtër të vendosur nga OSBE/ODIHR-i, 36 parlamentarë dhe punonjës nga Asambleja e OSBE-së, 25 nga APKE dhe 11 nga PE-ja kanë vëzhguar dje procesin e zgjedhjeve.
Në raportin paraprak, vëzhguesit e OSBE-ODIHR-it konstatuan se marrëveshja e 18 majit ishte kyçe për procesin e zgjedhjeve.
Megjithatë në raport vihet theksi te parregullsi si akuzat për blerjen e votës, presioni mbi votuesit apo ato për keqpërdorim të burimeve shtetërore.
“Gjatë ditës së zgjedhjeve në një numër të theksuar qendrash procedurat nuk u respektuan plotësisht. Pati intimidime nga aktivistë të partive politike, probleme me bojë dhe votime familjare. Zgjedhjet u zhvilluan në bazë të një besimi të ulët të qytetarëve.
Ndryshimet ligjore në vijim të marrëveshjes politike PS-PD kishin si qëllim të ndihmonin në promovimin falas të fushatës. Mungesa e konsultimeve publike sfidoi garancinë ligjore”, thuhet në raport.
Vëzhguesit e OSBE-ODIHR-it vlerësuan në mënyrë të veçantë punën e KQZ-së dhe mediave.
"Komisioni Qendor i Zgjedhjeve operoi në mënyrë transparente në lidhje me sfidat administrative dhe ligjore me të cilat u përball. Mediat siguruan mbulim të plotë dhe të gjerë, me analiza të fokusuara te 3 partitë kryesore”, konkluduan vëzhguesit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
