Familja e 55-vjeçarit Nikoll Radaçi, personi i cili shkaktoi aksidentin me pasojë vdekjen e dy fëmijëve në Durrës, është larguar nga banesa, për të shmangur çdo incident të mundshëm.
Gazetarja Ervina Garo raportoi për edicionin e lajmeve në MCN TV, se largimi është bërë nga policia, për shkak se familja e autorit dhe familjet e viktimave jetonin në të njëjtën zonë.
Duke qenë se drejtuesi i mjetit që shkaktoi aksidentin me dy viktima ndodhet në një lagje me familjet e dëmtuara, është parë e arsyeshme jo vetëm nga familjarët por dhe nga policia që të largohen nga zona për të shmangur çdo incident të mundshëm.
Është menduar si masë paraprake dhe që nga dita e djeshme një makinë e policisë ka qenë prezente në zonë për të mbikëqyrur situatën në çdo rast.
Ngjarja e rëndë ndodhi rreth orës 14:10 të së dielës, në rrugën “Ohri”, lagjja nr. 15, në qytetin e Durrësit, ku i dyshuari për ngjarjen është Nikoll Radaçi, 57 vjeç, banues në lagjen nr. 15, Durrës.
Radaçi drejtonte makinën e tij “Mercedes-Benz ML”, prej të cilës humbi kontrollin mbi drejtimin e automjetit dhe për pasojë goditi tre fëmijë të moshave 8, 10 dhe 12 vjeç.
Si pasojë e aksidentit, humbën jetën Eneo Muça, 12 vjeç, dhe Klesi Nikolli, 9 vjeç.
Ndërsa i mituri tjetër, 8 vjeç mbeti i plagosur dhe aktualisht ndodhet jashtë rrezikut për jetën.
Nga kryerja e testit të alkoolit rezultoi se 57-vjeçari e drejtonte automjetin, në gjendje të dehur: testi i parë 0.73 mg/l dhe testi i dytë 0.70 mg/l.
Nga veprimet e para hetimore, dyshohet se shkak i aksidentit është humbja e kontrollit mbi automjetin, si pasojë e drejtimit të tij, në gjendje të dehur.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
