Administrata Trump ka nisur një hetim mbi importin e makinave dhe kamionëve, çka mund të çojë në vendosjen e tarifave amerikane të ngjashme me ato të çelikut dhe aluminit.
Hetimi ka për qëllim të zbulojë nëse mjetet apo pjesët e importuara kanë kërcënuar industrinë vendase dhe mundësinë për të zhvilluar teknologji të avancuara, bëri të ditur në një deklaratë Departamenti i Tregtisë.
“Ka prova se për dekada të tëra, importi nga jashtë e ka dëmtuar industrinë vendase të makinave”, tha sekretari i Tregtisë, Wilbur Ross, i cili premtoi një hetim të drejtë dhe transparent.
Rritja e tarifave do të rëndonte në mënyrë të veçantë për prodhuesit aziatikë të makinave si “Toyota”, “Nissan”, “Honda” dhe “Hyundai”, të cilët i konsiderojnë Shtetet e Bashkuara si një treg me shumë rëndësi. Njoftimi për hapjen e hetimit nxiti një shitje të gjerë të aksioneve të automjeteve në të gjithë rajonin.
Qeveritë e Japonisë, Kinës dhe Koresë së Jugut kanë thënë se do ta monitorojnë situatën, ndërsa Pekini është shprehur se do t’i mbrojë interesat e veta.
"Kina është kundër abuzimit me klauzolat e sigurisë kombëtare, të cilat do të dëmtojnë seriozisht sistemet tregtare shumëpalëshe dhe do të prishin rendin normal të tregtisë ndërkombëtare", tha zëdhënësi i Ministrisë së Tregtisë, Gao Feng.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
