Po pastronte pistoletën, burri vret aksidentalisht gruan në Mirditë

Një ngjarje e rëndë ka ndodhur në fshatin Jezull të Mirditës, ku burri ka vrarë aksidentalisht gruan ndërsa po pastronte pistoletën. 

54-vjeçarja Vitore Pacuku u transportua menjëherë në spital për ndihmë mjekësore, por humbi jetën si pasojë e dëmtimeve.

"Blutë" kanë shoqëruar në komisariat bashkëshortin e saj Paulin Pacuku, ndërsa këtij të fundit i është sekuestruar edhe arma e zjarrit.

NJOFTIMI

Spitali Rajonal Rrëshen ka njoftuar sallën operative të Komisariatit të Policisë Mirditë, se ishte dërguar nga të afërmit e saj, për ndihmë mjekësore, shtetasja V. P., e plagosur me armë zjarri, e cila si pasojë e dëmtimeve kishte humbur jetën. Nga verifikimet paraprake të kryera nga shërbimet e Policisë, dyshohet se në fshatin Jezull, Mirditë, në banesë, shtetasi P. P., 61 vjeç, duke pastruar një armë zjarri pistoletë, ka qëlluar aksidentalisht bashkëshorten e tij, shtetasen V. P., 54 vjeçe, e cila është transportuar menjëherë në spital për ndihmë mjekësore, nga të afërmit e saj, por si pasojë e dëmtimeve të marra ka humbur jetën. Shtetasi P. P. është shoqëruar në ambientet e Komisariatit të Policisë Mirditë, për veprime të mëtejshme procedurale, ndërsa arma e zjarrit pistoletë është sekuestruar në cilësinë e provës materiale. Grupi hetimor, nën drejtimin Prokurorisë së Rrethit Gjyqësor Lezhë, vijon punën në vendngjarje, për zbardhjen e plotë të rrethanave të ngjarjes.