U dëmtua nga tërmeti, nxënësit në Peqin as këtë vit s’do të frekuentojnë shkollën e tyre

As  këtë vit të ri shkollor nxënësit në Shezë të Peqinit nuk do të mundin të ndjekin mësim në shkollën e tyre.

Ajo u mbyll si pasojë e dëmtimeve nga tërmeti i vitit 2014 ndaj dhe këtë vit nxënësit duhet ta vazhdojnë procesin mësimor, turni i dytë në Pekisht.

Fëmijët kanë në dispozicion autobus për transportin. Por fakti se janë turn i dytë nga ora 13 deri në 15:30 sipas prindërve i penalizon në procesin e të nxënit. Të shqetësuar ata akuzojnë vendorët për neglizhencë.

Në mbështetje të prindërve shprehet  edhe kreu i njësisë administrative Shefqet Tabaku, i cili thotë se pavarësisht kërkesave të vazhdueshme ende nuk ka asnjë fond për ndërhyrje.

Në shkollën 9-vjeçare në Shezë të Peqinit ndiqnin mësim edhe fëmijë nga fshatrat ngjitur, si Karthnek, Trash, Gryksh, të cilët tashmë u duhet të udhëtojnë më shumë kilometra për të marrë mësim në turnin e dytë.

Ndonëse prindërit disa herë janë ngritur në protestë për nisjen e punimeve nuk kanë pasur asnjë efekt.