Aleanca e Profesionistëve të Lirë që përfaqëson anëtarë në sektorë të ndryshëm në Shqipëri, i është drejtuar Drejtorisë së Përgjithshme të Tatimeve (DPT) dhe Agjencisë Kombëtare të Shoqërisë së Informacionit (AKSHI) me një shkresë në lidhje me problematikat e përsëritura në sistemin e fiskalizimit, të cilat po sjellin bllokime serioze në aktivitetin ekonomik dhe rrisin riskun e penaliteteve ndaj bizneseve për shkaqe që nuk burojnë nga subjektet tatimpaguese. Në një intervistë me MCN, Sotiraq Dhamo, president i Institutit të Kontabilistëve, tha se është detyra e Drejtorisë së Tatimeve dhe AKSHI-t të njoftojnë bizneset për problemet e sistemit. Ai theksoi se mosfunksionimi do të sjellë penalitete, të cilat nuk duhet të aplikohen.
Profesionistët e lirë, ata që nuk kanë blerë një program fiskalizimi, janë të bllokuar. Nuk lëshojnë dot fatura. Por edhe ata që duan të fiskalizojnë fletët e importit nuk e bëjnë dot këtë.
Ata që duan të shfrytëzojnë mungesën e sistemit mund të justifikohen se “nuk e dinim”. Sepse nuk po deklarohet zyrtarisht nga Tatimet dhe AKSHI që të thonë ky është problemi. Nuk e kanë për detyrë shoqëritë. E ka për detyrë Drejtoria e Tatimeve dhe AKSHI. Për mua përgjegjësi duhet të mbajnë ata që garantojnë funksionimin e sistemit. Tatimpaguesit nuk duhet të penalizohen si pasojë e këtij problemi. Vonesat kanë penalitete, të cilat nuk duhet të aplikohen për këtë periudhë. Subjektet janë në konfuzion. Nuk duhet të penalizohen, duhet transparencë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
