Këshilli i Lartë i Prokurorisë është mbledhur sot për të zgjedhur kreun e ri të BKH-së, ku emri i propozuar nga SPAK është Joni Keta. Gazetari Arsen Rusta në një raportim për Mcn Live bën me dije se KLP ka një përplasje të fortë mes vetes, ku një pjesë është për të rikontrolluar procedurën e bërë nga komisioni posaçëm i SPAK dhe pjesa tjetër pro emërimit pa kontestime të Ketës.
“Emri i ri i BKH do duhet të emërohet sot nga 11 anëtarët e KLP. Këta anëtarë sot do të votojnë për emrin e Joni Ketës. Kanë qenë 4 muaj verifikime, procedura, faza, testime. Mcn Live mëson përmes burimeve se edhe vet KLP ka një përplasje të fortë mes vetes për të rikontrolluar nga e para procedurën e bërë nga komisioni i posaçëm i SPAK, apo për të emëruar pa kontestime emrin e tyre. Do të jetë mbledhja e hapur që do të vendosë nëse Joni Keta do të marrë shumicën e votave. Për të bërë kuorumin do të mjaftonin edhe 7 anëtarë. Në rast të një barazimi, vota e kryetares Mirela Bogdani ka vlerën e një vote e gjysmë. Praktika e ndjekur i ka ndarë në dy kampe anëtarët e KLP-së, ata pro Joni Ketës dhe ata kundër. Ka midis anëtarëve që thonë ne s’jemi noterë që të certifikojmë një procedurë që është ndjekur nga një institucion tjetër”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
