Prokuroria e Tiranës orët në vijim pritet të komunikojë zyrtarisht ndryshimin e akuzës ndaj punonjësit të policisë Nevaldo Hajdaraj, i cili qëlloi për vdekje me armën e shërbimit 25-vjeçarin Klodian Rasha. Tashmë Hajdaraj do të përballet me akuzën “vrasje me dashje”, dhe jo “vrasje në kapërcim të kushteve të vetëmbrojtjes”, e cila ishte akuza e ngritur fillimisht nga ana e Prokurorisë.
Shkak për ndryshimin e kësaj akuze është bërë fakti se Hajdaraj ka qëlluar dy herë me armë në drejtim të Rashës, dhe mes tyre nuk ka pasur një konfrontim që mund të justifikonte faktin e veprimit në kushtet e vetëmbrojtjes. Prokuroria tha zyrtarisht se mes dy personave nuk ka pasur konflikt fizik, dhe fakti që Polici ka qëlluar dy herë, është në shkelje të plotë me ligjin e përdorimit të armëve nga punonjësi i Policisë.
Sipas Prokurisë nga kqyrja e kamerave të sigurisë, që sipas burimeve janë 60 të tilla, në aksin ku është zhvilluar ngjarja, tabloja e veprimeve të të dy personave është e qartë, dhe nuk lë vend për dyshime. Filmimi tregon se polici ka qëlluar nga një pozicion i shtrirë, drejt Klodian Rashës. Këndi i goditjes se Klodian Rashes, ka qenë në gjatësinë e trupit të viktimës. Filmimi ka zbuluar se Klodian Rasha, është qëlluar nga polici teksa ishte duke u larguar me vrap në rrugicën që të çon në banesën e tij.
Ndërkohë, ajo që mbetet pa u konfirmuar ende, është arma që u gjet pranë vendit të ngjarjes, e që sipas Policisë në njoftimin fillestar, thuhej se i përkiste Rashës. Për ekspertët është bërë i vështirë identifikimi i gjurmëve të gishtave, për shkak se arma ka qëndruar pak kohë në një pellg me ujë, çka e bën të vështirë identifikimin.
(Polici Nevaldo Hajdaraj dhe viktima Klodian Rasha)
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
